古星輝 - 5G助力中小企數碼轉型 | 乜都5G
各行各業要進行數碼轉型都講咗一段時間，但巿場仍然頗為兩極化。試過去餐廳食飯，職員喺門口第一句就話只收電子支付，唔收現金；但走入民生區嘅小店，好多時就只收現金，連電子支付系統都無，更談不上要做到線上線下融合（OMO）嘅生意模式。呢種情況，估計主要同兩樣嘢有關：資金有限，技術困難。
依家有好消息喇，政府繼以前推出「鼓勵及早使用5G技術資助計劃」，早前又推出咗「數碼轉型支援先導計劃」，以一對一配對嘅資助形式，重點幫助零售及餐飲業嘅中小企。成功申請資助嘅企業，最多可獲5萬港元資助，即項目總成本嘅一半。例如舖頭自己出5萬，政府資助5萬，每個項目嘅總成本上限為10萬港元，用以進行數碼轉型，提升營運效率。
先導計劃助解決資金技術問題
解決咗資金問題，呢個先導計劃亦搵咗業界好多公司針對三個重點，包括電子支付、網上推廣，以及客戶管理與優惠系統，設計咗各種基礎方案配套，以可負擔嘅價錢及容易周轉嘅月費方式，方便較少接觸科技嘅中小企採用，直接解決技術方面嘅痛點。
以我哋為例，公司就為中小企提供5G寬頻一站式零售管理方案，助商戶追上數碼時代嘅新消費模式，做更多生意。方案配合雲端支援庫存及推廣功能，簡化銷售及後台工作，提高工作效率，仲可以為中小企設計網上商店，或幫助快閃店做短訊流動宣傳，吸引目標客戶。
據講，喺整個先導計劃已上架嘅基礎方案配套約有190個，有啲方案可以為中小企添置自助落單系統、建立公司網站、設計社交媒體專頁，甚至支援電子會員計劃及電子優惠券等，包羅萬有；問題係企業能否踏出第一步。
新聞話截至上個月底，政府先收到300幾個申請，而計劃本身預期可以幫到最少8000間中小企，實際與期望有好大落差。
最近公司喺上水加強咗5G網絡覆蓋，我哋嘅「5G特工隊」就專程去咗附近嘅「藥房街」向商戶介紹5G寬頻。隨着越來越多人北上消費，無論藥房，以至零售業及餐飲業整體，都面對着各種挑戰。期望有咗5G加持，再加上政府嘅支援，能加快中小企數碼轉型，一同邁向以數碼經濟為本嘅新時代。
和記電訊香港執行董事及行政總裁
古星輝
