Executive日記——戲曲中心下月演出15場 賀任白《帝女花》65周年
KellyChu
2021-12-09 08:19
字體大小
西九除咗M+博物館吸引好多人潮聖外，戲曲中心都有唔少好節目。Kelly知道粵劇名家任劍輝和白雪仙演繹嘅唐滌生版《帝女花》，明年就係六十五周年，有粵劇機構準備下個月喺戲曲中心演出十五場《帝女花》，仲會安排學生戲台版及朗讀版等，要推廣傳統藝術，真係要花唔少心思先可以。
香港人總曉得唱一兩句「落花滿天蔽月光」，《帝女花》就好似代表咗粵劇，地位超然，而任白版本可謂經典。有粵劇工作舍為咗紀念任、白演繹唐滌生版《帝女花》六十五周年，會推一系列項目，回味長平公主與周世顯嘅亂世愛情故事；邀請十二位唔同年代嘅粵劇演員演繹末代公主與駙馬，劇本仲會重新整理增吸引力。
西九戲曲中心仲會有兩日安排《帝女花》學生戲台版、演唱版及朗讀版，學生從唔同角度演繹唐滌生作品，拉近粵劇與年輕人嘅距離。Kelly聽聞為加強推廣，明年會陸續推出跨界別藝術活動，以《帝女花》文本，激發想像，擴闊觀眾層面。
Kelly Chu
更多文章
