鄧達智 - 中伏｜講是非

鄧達智

2022-12-15 00:00

內容

自從八九年六月，帶着灰色的心情從雪梨、峇里島、新加坡、吉隆坡⋯⋯最後，初探檳城，一發不可收拾，先愛上、繼而深愛。要選亞太區三個可以居之家外之家：檳城、京都、杭州，每年必去！

曾經衝動在檳城置業⋯⋯情之所鍾，對一見鍾情的地球一隅，總想購下一小角，不用多，就一小角；猶如古老時代男人去到邊都心思置一頭家，納幾個妾侍，方便官人隨時駕到。西班牙Granada、葡萄牙Porto、日本京都、英國倫敦⋯⋯甚至遠在天涯海角阿根廷布宜諾斯艾利斯！

中伏情況⋯⋯血流成河！

首先Granada城外鄉間連泳池諾大橙瓦白牆橙園大宅，購入後，回去過兩次；那麼多地方可以去，想去，不可能次次度假都回去西班牙。

京都老木房子更慘，光修葺舊傷痕簡直鞠躬盡瘁！布宜諾斯艾利斯⋯⋯香港鑽個窿穿過地心，直落就係布城，再鍾意跳Tango，再迷戀梁朝偉失魂落魄嘅眼神，都冇需要置業㗎！

檳城佐治鎮吾心所鍾，睇中百年老屋，不算大，樓上樓下兩千平方英尺左右；購入前，偶然入住另一間類同嘅Air B&B，當時同行幾個朋友三人分一屋，笑住話：真係寸，三個人住一個Number⋯⋯入夜先知死，睡房在樓上，廚房、廁所，還有個古屋天井在樓下，深夜後何止安靜，簡直鬼影幢幢。天光之後，買古屋之念全數翻轉。

隔山買牛，遍地地雷，港人過去買樓好似買餸嘅習慣，全因香港買賣樓宇法例之寬鬆，世上絕無僅有；搞錯以為其他地方都一樣！

港人泰國置業；正，在下都買咗！

買咗之後出租後發覺，當地幣值難以寄出，只可於當地運用。想再賣？二手市場跟香港過去情況？發夢冇咁早！況且泰國國安法；外國人不可直接售予外國人，只能賣給當地公民，始料不及，賣樓中介何不明言？

換電話，從iPhone13至14，銀行運作立即停擺，必須親自到泰國上銀行將電話新資料更換才可再啟動⋯⋯簡單若此，都可以成為中伏伏筆，服未？
鄧達智