KellyChu - 提早派「賞月錦囊」 天文台︰中秋節5︰57pm月最圓|Executive日記
![■中秋節當日,滿月係下午5點57分。](https://image.hkhl.hk/f/686e386/0x0/100/none/fe7c1074dee047abc6e86b8b9ebb2f54/2023-09/wttp011p08a_3.jpg)
下個星期五就係中秋節喇,大家諗好點一家人過節未?天文台就話,中秋當日滿月會喺黃昏出現,而如果天氣情況許可,喺中秋節前後嘅夜晚,大家都可以睇到又大又圓嘅明月。天文台仲提早大派「賞月錦囊」,同大家教路,點樣賞月先至正!
天文台喺「賞月錦囊」裏面,詳細列出中秋節前後,月出、月上中天、月落同滿月嘅時間,方便大家揀嘅最啱嘅時間賞月。所謂「上中天」,就係月球橫越本地子午線嘅時刻,嗰時月球位於正南方,仰角係全晚最高。9月28日星期四,中秋節前夕,月出時間係下午5點38分,上中天(仰角63度)係下午11時39分,月落時間係翌晨5點46分。
記得留意天文台網頁
9月29日星期五,中秋節當日,滿月(嗰時月球喺香港地平線以下)係下午5點57分,月出時間係下午6時16分,上中天(仰角70度)係翌晨零時30分,月落時間係翌晨6時49分。9月30日星期六,中秋節翌日,月出時間係下午6時54分,上中天(仰角77度)係翌晨1時20分,月落時間係翌晨7時52分。
不過天氣幻變,中秋節期間,要知最新天氣情況同賞月條件,大家記得睇返天文台網頁喇!
Kelly Chu
![■天文台仲提早大派「賞月錦囊」,同大家教路,點樣賞月先至正。 ■天文台仲提早大派「賞月錦囊」,同大家教路,點樣賞月先至正。](https://image.hkhl.hk/f/1024p0/0x0/100/none/4f6890f96793db0e8dc9419bb356c6b5/2023-09/wttp011p08b_3.jpg)