KellyChu - 列車與民生息息相關 溫馨回憶多不勝數 輕鐵與居民慶祝同行35年｜Executive日記
KellyChu
2023-09-18 15:11
字體大小
在屯門元朗接載市民嘅輕鐵，今天慶祝35周年，噚日特別喺車廠舉行開放日，列車「五代同堂」亮相，吸引近4000名市民入場，好多人一家大細喺列車前拍照留念。小妹趁此機會到廠一遊，感受到屯門元朗居民同輕鐵一起成長，對輕鐵有一種特別嘅情懷。
輕鐵服務新界西北35年，喺屯門住咗近30年嘅歐先生，噚日同家人一齊參加開放日，特別穿上西裝、又打上領帶。歐先生直言「好尊重每一架車」，每一架輕鐵都為屯門居民帶嚟好多回憶！不少「屯元天」區居民都同輕鐵有緊密關係，有情人喺輕鐵上相識、求婚，甚至結婚組織家庭，到子女在區內讀書，亦一樣搭輕鐵，生活點點滴滴喺列車上發生。
港鐵展出第一期復刻主題輕鐵至第五期輕鐵車輛，以及輕鐵不同年代的物品，介紹輕鐵歷史並讓公眾了解輕鐵發展。現場亦有遊戲攤位、展覽區和紀念品銷售。好多居民早排上網撲飛，所有門票被秒殺，到昨天開開心心排隊入場玩遊戲。
輕鐵35周年，一直與居民守望相助。早前新界西北大停電，幸好輕鐵從別區調配電力到屯門區，列車服務得以維持，仲供應冷氣、WiFi等，居民一於遊車河兼避暑。而一班港鐵員工亦功不可沒，鑑於路軌轉接受電力停頓影響，佢哋自告奮勇，趕到路軌上以人力調節，令列車繼續服務居民，難怪大家感情咁深厚。
Kelly Chu
更多文章
