KellyChu - 30外賓乘中式帆船遊維港賞藝術裝置 | Executive日記
KellyChu
2024-04-02 02:00
字體大小
趁多項國際會展及文藝盛事匯聚香港，旅發局上星期特意為約30名會展旅客策劃一場藝遊維港之旅，帶佢哋登上香港傳統中式帆船「鴨靈號」，欣賞維港迷人景色，並觀賞兩岸多元精彩嘅藝術裝置，藉此豐富會展旅客嘅商旅體驗，好有心思。
旅發局配合「藝聚香港」宣傳推廣，向逾100名參與「WOW Summit Hong Kong 2024」及「《財富》創新論壇（Fortune Innovation Forum）」嘅訪港嘉賓提供唔同藝術體驗，包括送贈M+及香港故宮文化博物館嘅入場門票，更為約30名會展旅客策劃藝遊維港之旅，揚帆出海感受本港五光十色嘅都會風情及文化魅力。
嘉賓登上「鴨靈號」期間，由隨船導覽人員細心介紹香港文化中心、香港藝術館、戲曲中心、M+、香港故宮文化博物館等藝文景點嘅特色，於海上觀賞西九文化區大型裝置藝術《抱泡瞬間》、中環海濱「teamLab：光漣」展覽，飽覽維港兩岸多元精彩藝術，嘉賓沿途紛紛打卡留念。
從杜拜遠道而來嘅Ana Solana話，香港應有盡有，例如自然風光、美食、大型基建等，亦大讚本地人友善，認為香港係一個充滿藝術嘅城市，推薦每名訪港旅客親身體驗維港之旅，以及去參觀唔同嘅藝術展覽。
旅發局指，會透過爭取更多大型國際會展活動選址香港舉行，進一步鞏固香港「國際會展之都」地位，吸引更多會展旅客訪港，同時為佢哋創造更多特色及難忘嘅商旅行程，向外宣傳香港旅遊魅力。
KellyChu
更多文章
