KellyChu - 4特色展覽 設大型裝置供旅客打卡留念 機場文化藝術節 港式傳統工藝吸睛 | Executive日記
KellyChu
2024-08-09 02:00
字體大小
香港國際機場聯同多個藝術團體，由即日起至10月31日期間，喺機場舉行「香港國際機場文化藝術節2024」，推出4個各具特色嘅展覽，等旅客抵港及離港之際，都可以感受到香港嘅文化及藝術氛圍。
其中《香港工藝街》係一個大型互動藝術裝置，介紹6項本地傳統手工技藝，包括花牌製作、手雕麻將、中式點心等，透過藝術創作和互動元素，讓旅客體驗本地傳統工藝及獨特文化。現場除咗展示由師傅親手製作嘅作品，更有大型裝置展品畀旅客打卡留念。
準備離境嘅旅客，可以喺一號客運大樓離港層，欣賞《如畫香江：江啓明作品展》，細味藝術家江啓明多幅水彩畫作。作為香港土生土長嘅著名畫家，江老師以畫筆記錄本城一山一水、一景一物，透過寫實畫風向旅客展示出香港嘅獨特風貌。
接機大堂嘅大屏幕則播放着與本地藝術單位及著名藝術家嘅合作系列《踴動藝術之旅》，結合4條動態影像和動畫影片，從不同角度探索香港城市面貌與視覺文化。江啓明作品之一《如畫香江》，以數碼技術將如詩似畫嘅自然美景，轉化為動態影像。
當旅客由接機大堂沿斜坡走出地面嘅運輸中心時，可以睇到糅合中國傳統工筆畫及多媒體數碼科技嘅互動體驗作品。展覽以深水埗花布街為靈感，繪製一系列古今工筆畫作品，透過擴增實境及動態圖像設計呈現畫作。旅客亦可掃描二維碼進入虛擬世界，挑選畫作素材及主題色調，製作獨一無二嘅動畫作品。
KellyChu
花牌製作
中式點心
更多文章
