KellyChu - 個人奮鬥體會：父母支持 是孩子最大鼓勵 何詩蓓見粉絲 大人細路雀躍 | Executive日記
KellyChu
2024-09-09 02:00
字體大小
泳隊「女飛魚」何詩蓓昨日現身商場見面會，吸引大批粉絲捧場。談及東京奧運及巴黎奧運2屆分別贏得2銀及2銅，詩蓓認為今屆更加特別，因為有父母及朋友親自到場打氣，比賽時亦見到好多觀眾揮舞區旗，就似大家一齊見證佢過去3年嘅努力得到回報。
何詩蓓喺上屆東京奧運攞到100米及200米自由泳銀牌，今屆則喺呢2個項目都贏得銅牌，係本港歷來首位喺游泳項目贏得奧運獎牌嘅港將，同時累積獎牌亦係歷來最多一位。詩蓓拎住獎牌現身，形容今屆巴黎奧運嘅獎牌外型似太陽，中間塊鐵係巴黎鐵塔嘅一部分，好似將巴黎帶咗返香港一樣。
問及如何克服壓力，調整心態出戰，何詩蓓坦言，經過東京奧運後多咗人認識自己，所以今屆多咗外界對佢嘅期望，去巴黎之前一直同教練及運動心理學家面對呢件事，對團隊同自己有信心，加上出場時得到好多港人支持，感覺似喺屋企比賽一樣，從而得到鼓勵，可以放鬆心情比賽。
好多家長帶同小朋友到場一睹偶像風采，何詩蓓亦藉此分享自己嘅成功經驗，認為無論做任何行業，自身都需要非常自律，十分專注才能將每件事情做到最好，只要對一件事有熱情，無論幾辛苦都可以堅持落去，而父母嘅支持亦會成為對孩子最大嘅鼓勵，令佢哋知道無論失敗定成功，背後都有父母嘅支持同愛，呢點係非常重要。
KellyChu
何詩蓓送出親筆簽名，又同到場支持嘅市民合照。
最Hit
更多文章
