KellyChu - 廚師高級食材取勝 外賣平台落單 五星級酒店逆市吸客 外賣兩餸飯 | Executive日記
KellyChu
2024-09-17 02:00
字體大小
尖沙咀2間五星級酒店逆市出招吸客，推出外賣兩餸飯，雖然價錢不及坊間兩餸飯平，但勝在有高級食材同廚師料理，吸引食客嘗鮮。而兩間酒店都係透過惜食外賣平台接受定單，旨在減少食物浪費，似乎希望推出特色餐點之餘，響應環保趨勢，小妹認為都幾有新意。
九龍香格里拉酒店繼將大堂酒廊變身「五星級糖水舖」，以及推出$38起歎招牌薑汁撞奶後，最近喺酒店嘅自助餐餐廳Cafe Kool推出「兩餸飯」盲盒，有肉類、海鮮、素食及清真4種選擇，每盒賣$88。食客喺本地惜食應用程式CHOMP落單購買後，即可於30分鐘內享用由大廚挑選嘅指定主題自助餐盒。
另一間五星級酒店朗廷酒店推出$118「全能午餐盒」，餐盒包一份前菜、一份主菜及一份主食，用嘅惜食應用程式則係泰國平台Yindii，惟只在下午2點至3點期間發售。
有食客試過2間酒店嘅外賣飯盒，認為朗廷酒店嘅午餐盲盒色香味較佳，其中有冷盤韓式甜辣芽菜同沙律菜，熱盤則係甜酸醬豬頸肉配炒飯，不過價錢定價過百，可能未必係打工仔午餐之選。
而香格里拉嘅素食及清真盲盒都係配印度長米，肉類盲盒主食有紅酒煮牛肉，配菜烤肉及南瓜，海鮮盲盒就選中海鮮炒河，內有青口及蝦，配菜包括燒鴨背及青菜。4款之中，有食客認為肉類盲盒性價比較高，會考慮再購。
KellyChu
朗廷酒店推出$118「全能午餐盒」。
香格里拉酒店兩餸飯有4種選擇。
更多文章
