KellyChu - 百童首舞傳承文化 雙火龍穿梭大坑 市民遊客大讚氣氛佳 | Executive日記
KellyChu
2024-09-19 02:00
字體大小
昨晚係大坑舞火龍盛會最後一日，小妹把握最後機會去到現場，體驗呢個一年一度嘅香港傳統節慶活動。好多市民都同Kelly一樣特意嚟到欣賞，當中亦不乏中外遊客捧場。全長67米嘅火龍由逾百位健兒引領，穿梭大坑嘅大街小巷，氣氛好不熱鬧！
大坑舞火龍喺2011年獲列入「國家級非物質文化遺產」，昔日用作驅溫消疫嘅習俗，成為今日中秋傳統節慶，亦係香港引以為傲嘅文化寶藏。
今年旅發局將大坑舞火龍盛會升級，首次加入由大約100名小朋友舞動長達20米嘅LED小火龍，希望吸引更多市民和遊客觀賞，同時傳承舞火龍文化。另外亦首次喺維多利亞公園進行現場直播，以令更多人能夠一齊參與呢場盛會。
有市民認為，今年舞火龍嘅氣氛較以往更熱鬧、更有特色，亦有唔少家長帶同子女觀賞，希望下一代認識傳統文化。有小朋友話，睇到火龍覺得好有趣，又可認識傳統，形容場面壯觀，而且表演者能夠舞動又大又重嘅火龍，好犀利。
KellyChu
工作人員為龍頭換香。
最Hit
更多文章
