KellyChu - 諾貝爾文學獎賭盤 中國作家殘雪賠率大熱 | Executive日記
KellyChu
2024-10-10 02:00
字體大小
萬眾期待嘅諾貝爾文學獎即將於今晚揭曉。根據英國博彩公司預測嘅獲獎者賠率排行榜，中國作家殘雪再次位居榜首，今次已經係佢第6年被列入賠率榜單。對大家而言更為熟悉嘅日本作家村上春樹，原來已經「陪跑」咗18年，今年喺賠率榜單排名第3。獎項最後花落誰家小妹都好想知！
殘雪喺國內並不廣為人知，但佢嘅作品喺上世紀80年代起，就被翻譯成多國語言，更被哈佛大學等著名學府列作文學教材。只得小學學歷嘅殘雪自幼喜愛閱讀，其寫作生涯始於與丈夫經營縫紉店時，喺縫紉機上利用零碎時間寫小說，第一部作品《黃泥街》就係咁樣創作出嚟。此後佢嘅作品開始喺全國知名嘅文學刊物上公開發表，與余華等人被視為中國先派文學嘅代表人物。
近年來，每當諾貝爾文學獎頒發前夕，世界各大博彩公司都會設立特別團隊制訂出當年嘅賠率榜，成員兼具文學愛好者和精算師身份，佢哋會結合評委喜好、作品質量、公眾關注度等因素作出考慮。2023年諾貝爾文學獎得主係挪威作家喬恩‧福瑟，雖然殘雪當時都喺賠率榜排名第1，但喬恩‧福瑟都名列前茅排第3㗎。
KellyChu
更多文章
