KellyChu - 「Chubby Hearts Hong Kong」獲中國公關賽金獎 | Executive日記
KellyChu
2024-12-03 02:00
字體大小
今年2月期間舉行嘅公共藝術活動「Chubby Hearts Hong Kong」，Kelly至今仍記憶猶新，當時唔少市民都前往各區「追心」打卡，社交平台上洋溢幸福溫馨畫面。呢個活動更喺上個月嘅第20屆中國公共關係行業最佳案例大賽中，榮獲文化&娛樂&體育傳播類金獎。活動公關單位IPS傳藝公關廣告公司感謝各界大力支持，表示能獲此殊榮實屬「天時地利人和」。
Chubby Hearts係由著名設計師Anya Hindmarch構思嘅一個巨型飄浮紅心，喺2018年倫敦時裝周期間首次亮相，隨即成為全球設計界熱話。今年情人節至元宵節（2月14日至24日）登陸香港，除咗大紅心長駐中環皇后像廣場花園之外，細紅心亦飄到香港多個景點快閃。
IPS傳藝公關廣告公司董事總經理黃德源Peter話，面對內地眾多競爭對手可以脫穎而出獲得獎項，感到相當高興，「Chubby Hearts Hong Kong」作為香港政府支持嘅盛事之一，得到社會各界力撐，逾50位影星無償支持呢項活動，全因為大家都覺得呢件係一件開心事，能夠為社會帶來歡樂，好有意義。
佢留意到當時紅心喺各區快閃出現，好多打卡嘅都係銀髮族，公公婆婆臉上掛滿笑容，原來開心可以好簡單。而剛好活動檔期能安排在西方情人節至中國情人節期間舉行，可謂天時地利人和，才令活動舉辦得咁成功。
KellyChu
更多文章
