查小欣 - 「常真味」家的味道2.0 | 查乜料
查小欣
2024-12-27 02:00
字體大小
銅鑼灣開平道1號Cubus新開了間「常真味餐館」，由神秘名廚主理，聲稱秉承傳統及創新，無所謂菜系，無所謂章法，追求的是家的味道。
先講家庭日常菜蒸水蛋，入口便知龍與鳳，滑捋捋卻又Q彈，非一般蒸水蛋，不用水蒸，用蒸蠔蜆螺的鮮汁來蒸湖北蛋，上桌前點睛，用豬油爆香蔥粒灑上面，平凡中見功力，好食到味蕾都笑了，人人話戒飯，始終敵不過誘惑，用來撈飯。
冷盤酥香鳳尾魚，口感脆過薯片，不油、微甜，佐酒恩物，食唔停口。雙椒乳鴿，乳鴿去骨，鴿肉細嫩，鋪上紅、黃雙椒及翠綠蔥油，顏色艷麗，賣相超好。燒椒醬東風螺，螺肉軟稔，配燒椒醬，絕！連不愛螺的我都吃。酥蔥鮮鮑魚，炸蔥段提升了鮑魚鮮味及層次感。蟹肉牛油果脆盞，輕盈。水晶話梅紅石榴，清新味蕾。
有機番茄清湯配西施舌，勁鮮甜，加入紫菜，又是另一番風味。主菜來了，水瓜豆腐煮鮮蟹鉗，很特別的配搭，巨型肉蟹鉗啖啖肉，豆腐和水瓜索滿蟹的鮮味，3個原本淡口的食材變得美味。遠年陳皮蒸咸鮮東星斑，嘩！魚肉滑溜，沒落半滴豉油，卻滋味十足。大少酥薑蔥油脆皮雞，大少，常真味老闆丁先生也，用大少冠名，當然是招牌，皮脆肉嫩，一食入魂。
壓軸的濃湯花膠麵，先將靚靚大花膠炆腍，然後切至跟粗麵同樣粗幼，花膠粗麵合二為一，花膠份量十足，骨膠原滿滿，回味無窮。
「常真味」是家的味道2.0。當晚餐廳爆滿，竟每枱都是認識的朋友，都話大家都是不折不扣的為食貓！
查小欣
■雙椒乳鴿。
