KellyChu - 故宮館「劇透」11月展圖坦卡門珍品 | Executive日記
KellyChu
2025-01-14 02:00
字體大小
嚟緊唔使去埃及或大英博物館，喺香港就可以睇到法老王雕像，一睹古埃及文明神秘面紗。香港故宮文化博物館昨日預告，今年將推出4個特別展覽及3個專題展覽，其中11月壓軸開幕嘅「圖坦卡門與薩卡拉的秘密」(暫名)最為矚目，屆時將展出近250件來自7間重要埃及博物館嘅珍品，係本港近數十年來最大規模及最全面嘅古埃及展覽。
香港故宮文化博物館館長吳志華指，呢個埃及珍藏展覽目前喺上海博物館一票難求，但香港故宮文化博物館將會重新製作，取之精華，並加入多媒體說明，為觀眾帶嚟沉浸式體驗。佢亦表示，故宮館預期呢個展覽入場人次可達60萬，令全年總參觀人數將超過去年嘅300萬人次。
除咗古埃及文明展，另一個同樣萬眾期待嘅展覽，就係將於6月中開幕嘅伊斯蘭藝術展覽「文明交織：多哈伊斯蘭藝術博物館地毯珍藏」（暫名），將展出約100件包括伊朗、土耳其、印度嘅精美地毯、瓷器、古籍等文物，係故宮館首次同卡塔爾嘅合作項目。
Kelly亦對8月舉行嘅「莫臥兒王朝的珍寶」（暫名）展覽相當感興趣，呢個由蒙古人喺印度建立嘅強大帝國，全盛時期領土幾乎囊括整個印度次大陸，以及中亞阿富汗等地，舉世聞名嘅泰姬陵亦係由當時其中一代皇帝為愛妻而建。
吳志華話，去年入場睇展嘅訪客裏面73%都係非本地人士，當中好大部分嚟自東南亞國家，因此可見未來亞洲市場非常重要，佢哋亦會加強同其他亞洲地區業界合作，發揮好香港作為貫通中西文化嘅橋樑角色。
KellyChu
最Hit
馬清鏗已婚有老婆三十多年 16年來未曾公開提太太 啜爆網紅小三斷正
2025-01-14 22:02
70歲前TVB甘草變國際巨星？獲國務秘書接待備受重視 自稱有重大「任務」
2025-01-14 20:30
更多文章
