KellyChu - IBF世界殘疾人保齡球錦標賽 見證香港殘疾人運動發展新里程 | Executive日記
KellyChu
2小時前
字體大小
IBF世界殘疾人保齡球錦標賽依家喺香港舉辦得如火如荼，今屆世界錦標賽包括按視障、殘障和智障不同程度分級一共7個組別，每個組別再設有個人、雙人及團體賽，唔單止成為歷年來殘疾組別最齊全嘅國際賽事，仲係歷年來首次有殘疾人運動賽事取得「M」品牌𠻹。賽事見證住香港喺殘疾人運動發展嘅新里程，亦有望進一步鞏固香港作為亞洲體育盛事之都嘅地位。
喺開幕禮上，劉掌珠陪同世界保齡球協會會長Sheikh Talal Mohammed Al-Sabah及中國香港殘疾人奧委會會長馮馬潔嫻等主禮嘉賓一齊為舞獅點睛，宣布世錦賽揭幕。劉掌珠致辭時指：「能夠舉辦這項被認可為『M』品牌嘅國際性殘疾人賽事，我哋感到無比自豪。今次獲政府100萬元撥款用作推廣用途，另外我搵到多少贊助費，政府亦承諾提供同等嘅配對撥款資助。」
失明運動員透過扶住欄杆走上球道，由教練會告知運動員保齡球樽嘅位置，以及擲出保齡球嘅方向。其中屬於完全失明TPB1級別嘅視障運動員劉曉真喺兩年前接觸保齡球，「啱啱學嘅時候教練會講樽嘅排位，我哋要靠感覺去摸索。開始時好困難，打嚟打去都打唔中。」經過兩年嘅練習，佢認為：「打保齡球令我很滿足，因為可以出嚟做運動，亦唔使全日困喺屋企，身體都健康咗。」喺半年前佢已經開始備戰今屆世錦賽。
為咗推動公眾嘅關注，保齡球總會早前舉行「迷你保齡球體驗活動」，俾參加者可戴上特製視障眼鏡，體驗失明人士打保齡球嘅困難。劉掌珠指社區推廣活動好有成效，俾更多人知道視障保齡球呢項運動。馮馬潔嫻亦希望舉辦今次嘅賽事能夠推動社會大眾對殘疾運動員嘅關注，期望日後保齡球有機會納入殘奧競賽。
KellyChu
中國香港代表隊成員合照。
更多文章
