KellyChu - 人氣南韓啦啦隊打氣助興 七欖開幕禮將投影激光 開天幕放煙火閉幕 | Executive日記
KellyChu
2025-03-25 02:00 HKT
字體大小
年度體壇盛事香港國際七人欖球賽，將於本周五至周日喺全新開幕嘅啟德體育園主場館上演！為咗令市民和遊客盡情投入呢場精彩賽事，旅發局特意於活動注入一系列豐富娛樂元素，開幕典禮先帶嚟全新激光投影表演，閉幕禮更首次開放球場天幕綻放煙火，賽事期間亦會有人氣南韓職業棒球隊啦啦隊助陣，展現「盛事之都」動感魅力！
由中國香港欖球總會（欖總）主辦嘅2025年香港國際七人欖球賽，將雲集全球30隊頂尖七人欖球隊，一連三日喺啟德體育園主場館舉行72場賽事。旅發局除咗支持欖總安排飛龍舞獅為首日比賽打響頭炮，亦喺開幕禮引入嶄新激光投影表演，表演不但融合標誌性嘅香港元素圖案，亦會呈現經典賽事場景，搭配多變嘅閃爍效果與強勁音樂節奏，勢必點燃全場氣氛。
旅發局另邀來南韓冠軍級棒球隊啦啦隊、憑「三振舞」喺網絡爆紅嘅「起亞虎啦啦隊」其中7員，包括隊長金韓拿、劉世彬、朴星垠、千素妍、李昭旻、尹世麗和高嘉彬打氣助陣。佢哋將於賽事期間表演應援舞，並喺主場館及七欖球迷村進行快閃表演，以活力四射舞蹈與觀眾互動！
最後一天嘅閉幕式上，啟德體育園主場館天幕將首次打開，並於球場上空呈獻炫目煙火匯演。四方看台上蓋將安裝28個發射點，以多角度發放25米高嘅十色煙火，配合球場草坪上多支8米高火燄巨柱助興，為賽事劃上完美句號。
而為方便旅客規劃出行，旅發局更特別設立專頁介紹體育園交通攻略、周邊美食、購物及玩樂打卡熱點，又喺社交平台為參與七欖嘅球迷規劃玩樂指南，同時推出相關購物餐飲優惠，務求令大家盡興而歸，擴大盛事效益。
KellyChu
旅發局於閉幕禮首次開放球場天幕綻放煙火。
更多文章
