KellyChu - 做CEO 學營商賺錢之道 1500學生「趁墟做老闆」賣潮物 | Executive日記
KellyChu
2025-03-31 02:00 HKT
字體大小
「學校起動」計劃一年一度「趁墟做老闆」展銷會，上周五一連3日在荷里活廣場舉行。展銷會今年有超過1500名嚟自63間中學嘅學生參與，活動就似維園年宵，售賣各種創意產品，但同學仔唔需要競投攤位，透過今次創業機會更可發揮才能及培養商業觸覺，係相當好嘅學習機會。
展銷會現場有63個攤位，售賣逾300款產品。Kelly見大部分產品都好貼地實用，例如有手錶、衫褲鞋襪等，亦有不少創意潮物和公仔。
其中小妹好鍾意同學仔整嘅「職場卸膊操」金句文件夾，開會時應該可以大派用場，仲有「小人退散」、「聽日打風」符咒保佑各位打工仔，啱晒上班族入手。
據悉今年係「學校起動」計劃第13個年頭，計劃專為基層中學生而辦，模擬真實創業情況，參與學生需一手包辦起草計劃書、定價、制訂營銷策略及尋找供應商，一嘗做老闆嘅滋味。過程中要動腦筋又要團隊合作，相信頗有難度，但不失為挑戰自己並提升個人實力嘅好機會。
「學校起動」計劃基金會委員會主席吳天海話，多位曾參加「趁墟做老闆」嘅同學都不約而同認為，活動除咗令佢哋學到商業知識之外，最重要係提升到軟技能，而呢啲能力正是社會任何界別都需要嘅特質。
活動的最後一天，只見荷里活廣場人頭湧湧水洩不通，會德豐地產副主席黃光耀更大開金口上台獻唱，為同學們的努力喝采。
KellyChu
有中學生的職場金句大賣。
更多文章
