KellyChu - 登台獻唱炒熱氣氛 食檳榔辣條「中伏」甲亢哥訪長沙試剪紙湘綉 | Executive日記
KellyChu
2025-04-08 02:00 HKT
字體大小
美國網紅IShowspeed（內地稱「甲亢哥」）近期展開中國之行，佢先後到訪包括香港在內多個城市，旅程期間幾乎全程直播，而所到之處亦引來大批粉絲「野生捕獲」，場面哄動。Speed昨日到訪湖南長沙，獲當局安排體驗中國傳統文化例如剪紙及湘綉，行程豐富。但粉絲遞上嘅檳榔同埋辣條就令佢「中伏」，食辣食到怕。
Speed昨日喺長沙體驗多項中國傳統文化活動，剪紙師傅即場為佢側面剪出紙影，氹到Speed非常開心，大讚師傅好有才華。之後又試咗湘綉，認為好有難度，表示要完成一幅畫起碼要一個月。
佢登上接駁車時，有粉絲送上檳榔，Speed二話不說放落口，但後面顯得相當難受，指個嘴好麻好辣，車上全程皺晒眉又不斷摸心口。誰知去到下一站，有粉絲跳出嚟「挑機」，叫佢食咗包零食，Speed擺出亢奮形象接受挑戰，點知原來係「辣條」，忍唔住問「點解咩都係辣㗎？」好在後面咁啱有安排佢試飲特色茶飲，成功解辣。
Speed又登台獻唱炒熱氣氛，台下粉絲則趁機合唱《陽光彩虹小白馬》，令佢激動跳落舞台。由於呢首歌嘅歌詞反覆出現「內個」，與歧視黑人嘅英文詞語讀音相似，Speed曾喺直播中聽到呢首歌，露出搞笑反應，成為大家對佢嘅印象。隨後Speed玩咗傳統「投壺」遊戲和魔術活動，仲試埋長沙臭豆腐！
佢嘅行程實在太豐富，仲chur過香港人去旅行，小妹就唔一一細數。但作為一個全球網紅嚟講，Speed今次中國行嘅討論度相當高，令好多原本唔識佢嘅人都開始認識佢，亦引起各界對「網紅經濟」關注。
KellyChu
Speed食完檳榔，表示個嘴好麻。
最Hit
43歲TVB一線小生獨乘廣州地鐵冇人認得？ 面色蒼白令人擔心 近年減產自認脾氣火爆
2025-04-14 16:00 HKT
64歲做20年被即炒只獲7日賠償？！港男控訴公司一方法疑走法律罅：「我做嚟做去都係新入職！」勞工處回應事件｜Juicy叮
2025-04-14 13:00 HKT
派大圍公屋獲減租8個月 事主不解：單位非凶宅竟有大優惠？房屋署回應揭真相｜Juicy叮
2025-04-14 16:40 HKT
更多文章
