終於到我們中咗…… Covid︰無咗味覺似大感冒
[年頭回顧年尾篇]
英國 Covid 情況嚴峻，確診個案差不多日日十幾廿萬，而我們亦「有幸」為數字出一分力，全家齊齊確診。
話說聖誕前個多星期，細仔放學回家好唔對路，攰又無神無氣，仲有少少發燒，一做快速測試，就係雙線 positive，之後立刻上報學校，提早放聖誕假。雖然佢已經自我隔離房中，但最後，全家人都陸陸續續 postive 確診，呢個聖誕就在隔離同休養中度過，就算聖誕餐都只係簡簡單單焗隻雞，配個預早訂來的聖誕 Cheesecake 就算。
在香港中 Covid 好大件事，英國實在太多人確診，就算 lateral flow test 快測係 positive，都係叫你上 NHS 網站免費 order PCR TEST (即係撩完咳嚨再撩鼻個隻) 再驗，PCR TEST Kit 郵寄到家中，做完寄去指定地址的 Lab，就有更準確的結果。經驗話我知，其實屋企做的快速 test 都好準確吓，兩者結果基本上係一樣，無假陽性的情況。(而現在甚至唔使做 PCR，快測 positive 就直接 isolate。)
好了，4 個同屋人中 Covid，照計大家都中同一隻菌，咁係咪大家病徵都一樣呢？原來又唔係喎。
1. 細仔︰率先發病的細佬主要病徵係無胃口、好攰、有少少燒同喉嚨痕有幾聲咳。第二日已經無燒，第四五日直頭覺得佢已經好番。
2. 老公︰細仔驗出之後兩日發現，頭兩日無大病徵。第3日唔覺意屋企「攝」親，卻突然發冷同發起燒來，之後就開始周身骨痛，無胃口大病咗幾日。
3. 我︰我是老公之後再 3 日確診。病徵極似大感冒，頭重重赤赤痛，周身骨痛，有鼻水有幾聲咳，成日想瞓。而我係唯一一個真係無咗味覺的！係呀，食嘢只感覺到溫度、咀嚼到質感，飲汽水得啖氣，卻完全無味道，原來呢種感覺係非常詭異。
4. 大仔︰在細仔中招之後十日才驗出，只有咳的病徵，精神仲唔錯。
香港家人問我︰有無得睇醫生食藥㗎？要唔要入院㗎？如果唔係有嚴重病徵與併發症，一般都不會入院醫治，在家醫病靠食成藥，頭痛發燒食 Panadol，咳就食止咳藥，再加埋感冒藥同維他命 C 就是了。在我們隔離期間，英國政府 update 咗政策，只要在隔離第 6、7 日家中 self test 兩次都 negative 便可以出關。不過，我發現我家 4 個情況都係至第 8、9 日才出現 negative result，隔離 10 天比較隱陣。
感恩我們大致都已康復，針炙食中藥後，味覺亦在 3 星期後漸漸恢復，隔離期間亦有街坊幫忙買餸，令我地三餐無休。
