英國食魚只有魚柳？No way！原條蒸魚煎魚無問題

UK_nottsMama

移英港媽生活分享

2022-01-23 09:04

生活專欄

內容

由細到大都住近街市，細個時係真正的 wet market，就算婚後搬家幾次，都有個市政大樓街市在附近，買魚買海鮮唔係問題。但來到英國，想蒸條完完整整的魚，就要專誠去 Fish Monger (魚販) 了。

無疑超市都有魚買，但多數都係 fillet，無咩生氣，就算有原條的，望落都唔多新鮮。Morrison 超市比較好，內置一個鮮魚海鮮counter，有魚有蝦有貝殼類海產魷魚，價錢抵質素都唔差，不過論新鮮，首選都係 Fish Monger，雖然沒有游水魚，但魚類海產大多是朝早返的「即日鮮」，款式較多。Fish Monger 賣的海產就好似香港魚檔，display 在冰塊上，有的價錢斷 kg 計，有的一條一口價，亦有標明 10 鎊 4 條的優惠貨色。揀好魚，魚販就會幫你磅同報價，跟手把魚去鱗清潔內臟，返到屋企其實只要簡單清潔已經可以煮食。

魚檔打躉王有 Sea Bass 海鱸、Sea Bream 海鯛、Cod 鱈魚，其次係三文魚、Mackerel 鯖魚、Plaice 鰈魚、Monkfish 鮟鱇魚，我亦見過斑 Grouper、紅鰹魚 Red Mullet 同類似龍脷的魚。去魚檔買魚最難應該係睇住個英文名，完全唔知係咩魚，因為有啲魚真係未見過。不過，唔識唔緊要，只要肯問，魚販幫到你，仲教埋你點整。