無花市唔緊要！英國超市買年花

移英港媽生活分享

2022-01-27 09:34

內容

不經不覺，仲有一個星期就過農曆年，雖然人在英國，應該唔多人來拜年，但傳統習俗要保持，點都要買番盆靚花擺吓應節。無花墟無花市唔緊要，英國有包羅萬有的超市！基本上超市都有花賣，Tesco、Sainsbury、Lidl、Waitrose等總有一角賣花，普通買一扎花插下又得，不過呢個1月，市面最多的係好有過年氣氛的蘭花和水仙，連 IKEA 同 Marks & Spencer 都見到佢哋蹤影，當然是年花首選。

蘭花有大瓣同細瓣，顏色以白色、紫色、桃紅色、粉紅色的蝴蝶蘭為多，價錢平至 6 鎊左右已經有一盆，仲要連埋個靚盆，真係好抵！我在 Waitrose 買了盆，仲好貼心有埋標籤教你幾耐淋幾多水、放幾多溫度室溫最佳，甚至花謝之後，可以點樣令佢再開花。

香港的水仙以白色為主，是一個個水仙球水種，在英國見到最多的卻是呢款 Daffodils黃色水仙。在超市甚至可以見到一扎扎未開花的售賣，唔知仲以為係韮菜花。Daffodils 在英國有新開始、幸運的喻意，不過記得要一扎扎買，因為單枝反而有惡運的反效果。呢種水仙可以泥種，亦可以就咁插在花瓶中水養，好似一般插花般處理就得，真係好簡單。呢種 Daffodils 價錢好平，一扎只係 1 鎊左右，不過比起香港的水仙清香撲鼻，呢款黃水仙原來係無花香味，稍為可惜。在 Marks & Spencer 亦見到一扎扎同一盆盆開咗花的售賣，唔使驚開唔切花。朋友在 Tesco 亦見到有銀柳賣，配埋其他超市靚花，要插盆有新年氣氛的年花無難度。