Never say never! 英國撲靚蘿蔔，自己年糕自己整
移英港媽生活分享
2022-01-30 09:04
字體大小
從前做飲食記者，新年真係唔憂無靚糕食，蘿蔔糕芋頭糕年糕數之不盡，因此根本無想過亦無需要自己整糕。今次真係 never say never，來到 Nottingham，外頭基本上無咩地方有年糕賣，新年想食糕，就要靠自己動手了。
英國一般超市都有白蘿蔔賣，他們稱之為 Mooli，估計都係歐洲入口，不過大部分都係長條奀瘦型，用途多係作沙律，朋友買過用來整蘿蔔糕，覺得纖維比較高，唔夠幼滑，味道稍遜。臨近新年，街坊好友都紛紛趕住入手肥美大蘿蔔，除了中超、食材店容易找到呢啲靚仔貨色，在印度食品雜貨店亦可以見到。價錢方面都幾參差，中超的大隻靚仔，朋友買過合共 4 斤重，售 7.8 英鎊﹔細條啲的有超市賣 1.99 英鎊 3 條﹔我在食材店買的則是均一價 1.99 英鎊一條，入手兩條中大型蘿蔔合共 3.98 鎊，價錢合理，做兩底左右啱啱好。
有蘿蔔，仲要有最強綠葉蝦米、瑤柱同臘腸，前兩者隨家當早有寄來，貨源充足，臘腸選擇真係乏善足陳，唔好諗有多種唔同肥瘦比例選擇，基本上品牌都只有三兩個，當中我覺得聚德的臘腸肥瘦度唔錯，目測肥瘦比例似 4︰6，8 條共 360g 賣 9.8 鎊，價錢唔算貴，食得過。
年廿六開工做糕，白蘿蔔質素唔錯，水份夠，刨時已經聞到蘿蔔香。我哋唔鍾意太實身，主要只下粘米粉 (中超有售) 和調味，首次操刀，成品都唔錯，煎起上來唔太散，有蘿蔔味、軟滑，吃起來是住家的味道。
自己整蘿蔔糕的同時，我都幫襯了朋友的英國團購年糕組合，由移英港人炮製，蘿蔔糕 + 椰香年糕才 16.8 英鎊，每盒有 900g，真係香港一底糕都已經係呢個價。不過，呢款未開封試食，食評有機會再同大家分享。
