唔使 hk$200 英國食自助餐，究竟伏唔伏呢？
香港人鍾意食 buffet，好多朋友都係 buffet fans，每個月最少食一次。英國當然都有得食自助餐，不過就無香港咁方便，梗有一間 buffet 餐廳在左近。在諾定咸都有幾家供應自助餐的餐廳，最近試了這家 COSMO。店子在全英有 19 家分店，Bristol、Derby、Manchester、Reading 等都有分店。
餐廳裝修時尚，亦有不少廂座，坐得舒服。供應環球美食自助餐，午市自助餐成人收費 £14.99 起，晚市由 £17.99 起，小童價錢則 £8.99 起，可以食足 90 分鐘，自助餐本身係唔包飲品，每人加 £3.45 可無限添飲。以香港自助餐的消費來說，不用二百蚊港元就可以食到 Buffet，真係平到笑。
咁平，又有咩食呢？款式粗略計算都有七八十款，香港人最愛的凍龍蝦、大蝦、翡翠螺，全部沒有﹔日式counter 的三文魚、帶子、吞拿魚、甜蝦刺身亦欠奉，只有平時我都唔會望一眼的幾款卷物。觀乎食物，以熱食佔多，當中又有不少是香口炸物如炸雞、炸魚，當然不乏西式美食如ribs、DIY burger、Pizza、意粉等，中式 counter 亦有咕嚕肉、中式煮魚、點心、各式炒粉麵等。Carving counter 雖然有 Roast Beef、Ham、Roast Chicken，可惜 Roast Beef 煮得太乾身，嚡過阿婆塊面，實在唔合格。
比較好吃的是椒鹽炒蝦，香口惹味﹔北京填鴨絲夾餅味道也正常，中式點心如叉燒包也做得有辦有眼。日式即燒 counter 有廚師即場以鐵板燒炮製蝦、薄牛扒、魚柳等，也尚算可口。反而咖喱比較有驚喜，由印度人主理，各式印度咖喱配雞、羊、魚等款式唔少，仲有即製 naan bread 同印度脆餅，可以 encore。
甜品款式有十多款，蘋果批、bread pudding、芝士蛋糕、puff、brownie 等又唔太差可以食下，自助餐必備的朱古力噴泉、即唧軟雪糕當然最受小朋友歡迎，雪糕杯沒有 Häagen-Daz (Häagen-Daz 超市買也不貴呢)，卻是自家訂製的 gluten-free、素食者都啱食的雪糕。
香港的自助餐本來就是世界級高質，加上這兒食材選擇少一截，廚師亦無香港咁多元化，奄尖食友如我可能大失所望。又咁講，一分錢一分貨，朋友話唔使二百蚊有得任食，也不能要求太多。
