英國中學派位放榜，無呈分試無面試的大抽獎
五年前哥哥在香港玩中學派位大抽獎的情況依然歷歷在目，又要考好呈分試又要預備中學面試，大人小朋友都好累。剛剛的星期二 (1/3) 是英國中學派位放榜日 (National offer day)，興幸細佬唔使再玩同一個遊戲，今次可以輕輕鬆鬆等放榜。
每年 10 月是英國報中學的月份，Year 6 的同學仔可以去自己 council 網頁去申請中一學位，全程 online 申請，好方便，在10 月尾之前仲可以上網頁再作改動。Nottingham 的情況是家長可以為小朋友揀 4 間心儀中學，再排次序，教育局就會因應你的選擇，與學校收生準則作配對而派位。當然，這裡指的是 state school，如果小朋友要考的是 grammar school 或 private school 報考的日子或方式就不同了。
英國小學無考試，更加無呈分試，家長揀選學校時唔需要再考慮小朋友係 band 幾學生，而可以完全根據自己的喜惡去選擇。GCSE 成績好、校風好、Ofsted Outstanding 的中學當然最受歡迎，不過家長都要認清自己的條件才去選擇。一定一定要小心睇清楚不同學校網頁的收生優次準則，大部分有linked/ connected school 的中學都會以聯繫/ 直屬小學優先，亦有看 catchment 遠近、宗教、兄姊為校友等因素作不同排列，因此，部分極有口碑的熱門學校，就算距離屋企只是5 分鐘步程，都未必一定派獲學位。
派位日同樣是網上通知，在 1/3 凌晨已經收到 email 通知，亦可以於council 網頁查看。派到心水中學，可以回覆 accept offer﹔至於派得唔理想，甚至有家長表示 4 間所選中學都派唔到，而派了另一間，家長可以考慮 appeal (上訴)。細佬好幸福，在「兄蔭」之下，順利派到第一志願哥哥間中學，9 月開始兩兄弟可以一齊返學了。
