【英國置業】新居入伙邊度買傢俬好？有兩樣嘢要試過先好入手
在英國，無論租屋定買屋，總要面對買傢俬呢個問題。在香港，designer’s home、IKEA、實惠，仲有大大小小有時尚有實際的傢具店可以選擇，最重要係搭程車好快就到。英國買傢俬，基本上有幾條路，一係行online路線，Amazon、ebay、IKEA……咩嘢睇啱款價錢 ok 就一click畀錢，等送貨到家中。要不就可以直接去唔同傢具店行逛，好似 Dunelm、Next Home、M & S Home、IKEA、Homesense 等，直接畀錢，再安排送貨。不過，有兩樣嘢我係一定會睇過實物先至入手，就係床褥同梳化。
床褥︰英國的床褥普遍軟身，香港人真係接受不了，瞓慣硬嘢的香港人最基本係要揀 Firm 或者 Extra-firm，不過唔同品牌對床褥軟硬定義都略有差異，加上每人對於硬度的要求與感覺都唔同，難怪成日聽人講，xx 牌子 Extra-firm 都唔夠硬！因此，最好的方法係要自己試坐試瞓下，既可以去唔同品牌的專門店，而我則會去 Bensons for Beds 試。呢間係床上用品專門店，英國的床褥大牌子幾乎都可以在這裡找到，店內雖未至於陳列晒不同牌子所有不同軟硬度的選擇，但亦有唔少 Firm 同 Extra-firm 的推介，亦有半床 firm 半床 Extra firm 這樣的合併選擇。店內仲有店員可以按你的需要作推介，絕不 hard sell。當然，唔怕麻煩嘅話，買咗床褥之後發覺唔啱瞓，好多都可以在指定日期（如 100 天內）退貨。
梳化︰同床褥情況相似，梳化可以腍到一個點，一坐落，pat pat 已經座低咗一半，英國人覺得好舒服，我同樣受不了。所以買梳化同樣建議周圍去試坐下。英國有唔少 retail park 儼如一個小型購物城，集結唔同商店，而有啲更主打傢具傢品。好似今次去呢個，除了有 IKEA，仲有幾間專賣梳化、餐枱餐椅、電視櫃等的傢俬店，Sofalogy、Next home、Barker and Stonehouse，有平有貴有型有設計的都可以找到。在 display 的梳化試啱，就可以揀色揀 2/3/4 seats、corner seats，又估唔到都幾多顏色可以揀。
呢啲店舖間唔時仲有啲 ex-display的傢品現貨平售，不時半價起，大部分都只係有少少 defect，如果啱其實都幾抵。
