【英國租屋】退租前一定要professional cleaning？可以攞番幾多按金？
回一回帶，又講下交回舊屋畀業主的預備。英國好多租約都列明，租客是有義務清潔修補好間屋先交回業主，如果業主唔滿意清潔程度，或者有嘢要修理，法例係準許業主可以在按金扣除，即是說呢啲費用都係由舊租客負責。
我嘅舊屋係由物業管理公司管理，完約前特別問定有無清潔公司介紹，因為部分業主係有指定用開的公司或者要求，無疑用佢介紹的應該可以順利過關，不過一般費用可能略高，加上管理公司無推介，我唯有自己搞掂。
聯絡過幾間清潔公司問價，一般 3 房 3 廁都要收費200至400 鎊，仲要地氈唔包濕洗，焗爐抽油煙機等另計，最後決定試下鄰里App推介的私人domestic cleaner，即係好似我哋喺香港用開嘅鐘點。鐘點以時薪計，每小時10鎊 (英國最低工資 9.5 鎊一小時) 都算合理，知道我哋係 end of tenancy，表示會二人來做，預5至6小時，即是說收費 120 鎊。既然管理公司無要求一定要 professional cleaning，我便即管試試這個鐘點二人組。
舊屋重災區絕對是浴室企缸，由於我們平日疏於清潔，磚之間已經生出灰色的霉菌，最難清理，我絕對要讚清潔後雖未至於新的一樣，但佢哋幫我清理大部分明顯的霉漬。第二災區係廚房，她們幫手清潔所有廚櫃內外、爐頭、抽油煙機、雪櫃等，由於佢哋始終唔係專業級的清潔公司，清潔機器欠奉，用雙手處理的情況下我覺得還可以，但焗爐我哋要另外買來強力 oven deep cleaning kit 再補補飛。其餘房門、內窗、樓梯扶手、廁所等都有清潔，地氈只做吸塵及噴上清潔劑的hovering，120鎊這個價錢我覺得算交到功課。最後我們再為屋內刮花的地方補一補油，便交屋。
咁最後究竟管理公司退回幾多按金？一星期後我收到管理公司專人負責的check out report，裡面圖文並茂列明每個房間廁所浴室廚房於入住前後的清潔狀況，最後扣減了54 鎊左右作為追加清潔客廳百頁簾、洗衣機、水喉、廚房枱面等的收費，我哋可以取回約 800 鎊的按金。由於自知清潔未達professional standard而只能算是domestic cleaning的標準，因此接受了管理公司的方案。如果租客覺得業主獅子開大口唔合理扣除巨額按金，其實是可以上訴再商討的。
