【飲食】英國｜《藍色多瑙河》VS《綠袖子》英國雪糕車總有一架喺左近
最近迎來英國第一次熱浪，英國中部氣溫急升上 32 度，可以想像南部更熱。天氣一熱，附近雪糕車出動更密，不時傳來音樂聲，吸引大小朋友出去幫襯。
香港的富豪雪糕車，多數只在旺區、旅遊區或者人多的地鐵站附近出沒，英國的雪糕車卻無處不在，大公園、市中心、學校附近當然是主要盤據點，但佢地仲會周圍兜，行勻大街小巷，務求音樂聲傳遍住宅區的不同角落，召喚小朋友出來買雪糕。基本上每個住宅區都總有一架喺左近，我舊居附近，更有 3 架不同的流動雪糕車，因此每到下午放學時間就會聽到雪糕車音樂。
富豪雪糕車的《藍色多瑙河》陪伴我長大，英國的雪糕車聽得最多的是播放英國傳統 folk song《綠袖子》的調子，不過原來英國雪糕車仲有其他幾款調子可選，另一熱門調子就是 Preciosa，有興趣的朋友可以睇下呢條片︰按此觀看
香港的富豪雪糕車外型基本上是一式一樣，英國雪糕車的車身好多都是由車主粉飾，平實一點的在車身貼上巨型軟雪糕貼紙，更多係貼上卡通圖案，如 A 貨米奇美妮唐老鴨等，Amazon、eBAY 都有唔少車貼款式出售。雪糕款式都係以雲呢嗱味軟雪糕為主，不同價錢選項只係分別在加 flake 朱古力條、加 toppings，或者轉 waffle cone、double cone 等等，另外就係供應思樂冰/ 思樂冰加雪糕之類。我食過好幾次唔同雪糕車的出品，味道質感都可以幾唔同，做得好的入口 creamy 富奶香，不過都有唔少入口係冰感比較重，似霜淇淋，無咩奶味，令我懷疑佢地係唔需要跟足 original 配方去調雪糕漿的。
Google 一下，發現英國雪糕車都有唔少有趣小知識︰
1. 見到 Mr Whippy 同 Mister Softee 就知有軟雪糕，前者由雪糕品牌 Wall’s 擁有，另外，車身不時可見 “99” 或者 “99 Flake” 其實都係軟雪糕意思，99 Flake 就係指軟雪糕上插上吉百利的朱古力條。
2. 播音樂吸客都有規矩，最少要隔 2 分鐘先可以播一次，每次不能多於 12 秒。時間上不可於中午 12 時前或晚上 7 時後播放，不過我懷疑夏天係有放寬時間。
3. 播放地方也有限制，不可在醫院附近 50 米，學校上課期間、周末不同宗教崇拜禮儀期間也不可在處所 50 米範圍內播放。
4. 至於幾錢可以入手一架雪糕車？ 5 年車齡的平均售價為 £15,000，全新的就貴好多了，叫價由 £60,000 起！當然仲要有相關小販牌照、Food Hygiene 證書等。
