【住院】英國公立醫院好伙食？｜有炸魚烤牛肉 仲有自選甜品
雖然無人想住醫院，但如果一定要入院，而醫院伙食好，大概可以為疲憊受傷的身體帶來一點慰藉。Touchwood 咁大個女，在香港住醫院經驗 5 隻手指數得晒，已經包括兩次生仔，印象中午餐晚餐係無咩選擇，更加唔好講好唔好食了。
英國公立醫院都是 NHS (國民保健署)轄下，唔肯定醫院伙食係咪個個城市間間醫院一樣，但大致模式應該都相差無幾吧。由早餐開始、午餐、茶點、晚餐，我會話真係估唔到醫院伙食可以咁豐富！
先由早餐講起，一般都有多士 (係熱辣辣，有人幫你烘埋㗎！)、加牛奶的穀物早餐如 cornflakes、rice krispies、weetabix 等選擇，有專人幫你即沖 coffee or tea，仲好細心問你想要幾多包糖，飲開 black coffee 的又可以走奶，盡量迎合各人口味，唔知以為去咗餐廳。
重點落在午餐上，每日有 3 款熱食、1 款沙律及三文治選擇，3 款熱食必定有一款是為素食者而設，揀完熱食的主食，未完，還可以自選配菜如薯蓉、薯仔、薯條和是日時蔬，組合完個 main dish，仲有甜品可以揀，除了每日鐵胆雪糕、水果包、乳酪，仲有 2 款熱甜品，一般都是一款 crumble 搭一款 sponge cake，真係超級豐富！晚餐又有另一個 menu，但組合相似，同樣是揀完 main 再揀甜品。
看看印刷精美的餐牌，其實食物選擇都幾多元化，主食有豬牛雞腸仔等，多是英國菜中的菜式，一星期 7 日 14 餐都有唔同選擇！星期五係英國人的 Fish and Chips day，醫院也在當日供應炸魚薯條，仲跟足傳統配埋 mushy pea 豆蓉。炸魚啖啖肉幾有質感，薯條係 fat chip，我最愛，成個感覺同炸魚店食真係相差不遠，加埋甜品 plum crumble，真係飽到上心口。星期日是 Roast Sunday，又有傳統到爆的烤牛肉配薯仔加 Yorkshire pudding，真係病人都可以有好口福。
至於早午晚餐之間，仲有幾 round 茶點，可以再飲幾杯咖啡茶果汁，亦有包裝餅、薯片派發，唔少都係超市的熱賣品牌與口味。小朋友住院呢，亦有自己的餐牌，熱門食物 mac & cheese、lasagne、pizza、chicken nugget、fish finger、burger 等有齊，選擇好啱小朋友口味。大家都知英國係多元社會，餐牌中除了有為唔同食物敏感人士而設的餐牌，仲有回教、猶太教、非洲 style 和中式餐牌，盡顯對各地人士宗教的尊重。
