【英國校園】港童帶飯被指「臭」｜移英港媽經驗分享：午餐最適合帶咩？
近日網上瘋傳文章，講到移英港童帶飯返學遭嫌棄指「很臭」，慘慘豬。朋友即刻 forward 畀我，問我有無咁情況，因為佢知道我兩個仔一年來都係帶飯返學的。兩個仔就讀的學校，很幸運無論中學小學都無遇過呢種被嫌棄的情況，大概因為我哋無試過帶肉餅飯同排骨飯吧！
在英國，學校無論中小學都有飯堂，平均 2 鎊幾一個餐，符合資格的仲可以申請 Free meal。每日有不同餐單，款式如肉丸飯、意粉、pizza、漢堡、三文治、豬肉卷等都好常見，小學午餐大部分有主食外還配以甜品或薯片等，小兒子成日說同學食完件蛋糕就走咗去玩，真係玩大過天。兒子們試過一兩次學校餐，覺得屋企飯好食啲又啱口味，因而決定帶飯生涯。在無微波爐翻叮的情況下，飯壺係我哋最常用的帶飯容器，大牌子如 Thermos 都是來到英國才購買的。
之後便是與他們相討餐單。坦白講，放飯壺來說，肉餅、排骨、蒸雞的確不是好選擇，就算不傳來特別味道，口感也容易變嚡無晒肉汁，令好味度大打折扣。自問廚藝唔叻，一星期五日餐單，我哋基本上都係番茄肉丸意粉、炒飯、日式咖喱飯、炒烏冬、煙三文魚意粉、香草煙肉意粉等輪住 loop，間唔中再整吓港式口味如粟米肉粒飯、免治牛肉飯、星洲炒米，為午餐添一點新意，在早上預備起來亦容易，到午餐吃亦不致太糊太難食。天氣熱，對熱食需求稍減，又整吓三文治、熱狗、韓式飯卷，這些放餐盒就算室溫也能保持質素。
其實在英國帶飯返學亦不是港童獨有，我的意大利朋友也會homemade 意大利薄餅、整 panini 包、pasta 給小朋友做 lunch。英國有咁多民族居住，印度人、非洲人也有他們特別的食品，同學仔小朋友可能好直接把難聞難看的感受說出，也無可厚非，始終小朋友就係咁直接！重要的是培養小朋友多一點同理心和sense of humour，就不會太易被hurt到。如果同學仔話 「smells disgusting」時，何不輕鬆回應「it does not smell very nice but taste good, want to try？」，這種英式幽默，正是從小學生學起。
