【英國】慳錢貼士｜油價高企踩單車慳油錢 二手單車30鎊入手
日日經過油站，見到價錢高企，唔少揸車一族都呻油錢貴，每月支出大增。英國朋友都開始實行慳錢大法，步程唔遠嘅地方行路當然最好又環保，返工用公共交通工具方便又經濟，像我住的地區，用App買十程巴士票 35 鎊，平均每日才 3.5 鎊，當然要花的交通時間就會較長。想連車費都慳番，唔少英國人會選擇踩單車。
返工返學踩單車
踩單車基本上是英國人生活日常，英國小朋友從小在學校或者屋企人處學識踩單車，好多去到初小已經踩到識飛咁，單手、離手、抽高咩都得，非常厲害。上到中學，更有唔少係踩單車返學，踩馬路也難唔到佢哋，學校一般都有 bike shed 畀小朋友放單車。大人返工，亦有唔少人選擇踩單車，慳錢唔怕塞車之餘，每日返工放工踩十多廿分鐘車就是最佳運動。
單車路線規劃完善
由於英國大力鼓勵市民踩單車，好多城市早有單車路線規劃，馬路上亦有劃出單車專用線，紅綠燈前最前排的停車位更是供單車使用。因此，不難發現馬路上一邊有人踩單車，而旁邊就是巴士、私家車飛馳。既然行得馬路，踩單車的同樣要遵守路面規則，好似在英國有關道路規則的 Highway code 就有列明踩單車的守則，一般如不應在行人路踩車、keep住左線、在路口停車線要停、轉入迴旋處亦要跟足揸車規矩等等，免生意外。當然，佩戴合適頭盔、穿上反光背心或者sharp色衫讓其他道路使用者容易留意到你，亦有助保護自己。
僱員買單車有資助
英國唔少公司都有參加 Bike to Work Scheme，僱員可以透過公司參加此計劃買單車或裝備獲得資助 (可以高達 40%！)，僱主亦可以減稅，win win。唔買新車，喺英國二手車都好普遍，一般代步用會選 road bike，車價錢可以平到 30 至 40 鎊一架。
單車有男女款之分
Nottingham 是單車製造之都，其中一個牌子 Raleigh 就是本市出品，歷史悠久。我地試過在網上買到一架 80 年代產的 Raleigh 單車，由顏色到小配件都好復古，性能仲唔錯，上斜路都夠力，幾好踩。在香港無玩開單車，第一次落地買單車好多學問都唔識，好單純咁試上 seat 踩得幾順就可以，後來先識分 men bike 同 ladies bike，原來上車感覺都好唔同，好似女裝車一般 seat 前鋼位會呈 V 字及較低，方便女士穿裙子或者隨時移前站穩，而男人車一般是直鋼條呈三角，唔怪得之前踩個仔架車成日覺得唔多順，以後換車都要注意。
男士車⬇
女士車⬇
