【熱浪】史上最熱！英國人在40度無冷氣下點生存？ 閂窗、拉簾、開窗 3 部曲！
英國本地新聞講咗成個星期，終於捱過英國史上最強 40 度熱浪。40.3度比 2019 年熱浪溫度更高，天氣預警登上極端天氣紅色級別，意思係好大機會會危害健康，火車飛機地鐵服務受影響，供水公司都發出呼籲叫大家唔好過份使用和浪費食水，以免影響社區供水。來英一年多，之前幾次熱浪都覺得無嘢，今次 Nottingham 在星期二最高錄得 39.8 度，連中部都感受到熱浪的威力！好在兩日一夜熱浪已過，又回復廿多度涼風送爽的日子。
先講下個人體感。在香港夏天亦有高溫熱到不行的日子，毋疑「濕加熱」郁兩郁就出成身汗係難頂，但香港勝在除了在街上，度度都幾乎都有冷氣，熱到死只要入室內過過冷河就舒服晒！英國呢，是「乾熱」天氣， 40 度高溫而濕度係10%，街上雖然有少少風，但萬里無雲、猛烈太陽狂曬 5、6 個鐘都真係好焫，防曬、帽、太陽眼鏡係出街必備。英國好多地方都無冷氣，試過39度高溫坐巴士，開住窗都覺得似蒸爐咁，係細個坐「熱狗」巴士的感覺。英國的屋仔保溫就叻，散熱卻唔耍家，因此晚上到瞓覺時，樓上房間依然係焗，加上地氊效應，更加熱。在無冷氣情況下，一房一風扇，一家人開足 3 把風扇狂吹才勉強瞓得著。到晚上全屋最涼反而係鋪地板的客廳，有朋友索性一家在廳過夜，表示唔熱又涼快。
專家教路︰閂窗、拉簾、開窗
在熱浪真正來臨前，唔少報導已經教大家點應對。喺早上未太熱時可以開窗通風，但在 11am 至 5pm 左右最熱嘅時間，就要把下層窗閂晒，以免熱風入屋，熱空氣上升會困住上層，令睡房更熱。同時要把窗簾拉上，減少陽光入屋，英國有唔少窗簾除了遮光，仲有 cut heat 的效用，可以阻擋陽光熱力。到傍晚 5、6pm 左右太陽開始收，就可以開大窗，有對流窗更佳，開行風扇，令較涼空氣吹入屋，有助室內降溫。
酷熱天氣學校停課早放
熱浪來臨嘅兩日有唔少學校停課早放，不過並不是由教育局宣佈，而是學校自行決定。我仔小學都提早放學只返半天，而中小學都推便服日，大家都唔使著恤衫西褲同打呔。學校停課有很大爭議，有家長認為咁熱返學罔顧學生安全，就算學校唔停課都自行請假，不過有啲雙職家長則請唔到假照顧突然停課嘅仔女而唔想停課。對學校因為熱而停課最初都唔理解，後來同兩個仔傾開，學校固然無冷氣，連風扇都係得一把牛角扇放角落，根本上吹唔到風，可以想像有幾熱。小學生更加取消所有室外活動，只能留班房做最輕量的學習。
英國人點降溫？
多飲水固然係 NHS 英國衛生處的最高指引，大人小朋友的浸水池呢輪都熱賣，正好派上用場，超市雪糕雪條也賣清光。由於餐廳酒吧好多都無冷氣，好多都寧願暫停營業或者提早收舖放自己假。而我發現唔少英國人同我一樣，呢兩日喺超市逗留時間特別長，因為大部分超市都可以歎冷氣！唔怪得超市內的 Café 亦特別受歡迎。另一樣係明明口中話熱死人，但好多英國人依然愛在大熱天開 BBQ party 燒嘢食，傍晚燒到夜晚，食住肉吹水，冰凍啤酒一枝又一枝，熱中一點涼。
