【飲食】任食！無敵海景餐廳2.5小時榴槤放題＋榴槤市集＋機票大抽獎

YanOnTheRoad

放棄減腩，不願停步！

2022-07-18 08:00

生活專欄

內容

熱到飛起，但又未可以想飛就飛去旅行，作為榴槤控，就更加掛住馬來西亞七、八月的榴槤。好彩，香港有酒店繼續舉行一年一度榴槤宴之外，仲有靚景靚裝打卡餐廳推出榴槤放題。霸定樓高兩、三層的落地玻璃窗旁位置，歎住冷氣望住無遮無擋維多利亞港景色，兩個半鐘頭內勁食厚肉榴槤。有幾正？我上星期已親身體驗過，大滿足！

位於灣仔碼頭二樓的Pier 1929，經常與航空公司和旅遊局大玩crossover。餐廳將於八月份與馬來西亞旅遊局和AirAsia合作，推出以「Monster Durian」為主題的市集和下午茶。先講榴槤控最關心的下午茶，每位$680，就可以在2.5小時之內，無限任食多款馬來西亞榴槤，以及一人一份用榴槤炮製的鹹甜點tea set和榴槤燉雞湯。

三層架榴槤點心Tea set

一人一份的下午茶三層架為幻彩透明榴槤造型，好搶眼！鹹甜點包括D24 榴槤芝士脆撻、D24 榴槤菠蘿油、山竹石榴無酒精雞尾酒啫喱、榴槤朱古力、馬來西亞喇沙榴槤蝦多士、榴槤吞拿魚他他墨西哥薄餅，以及D24榴槤炸波波配辣肉腸。另外，還有以榴槤果肉、杞子雞熬足3小時的榴槤燉雞湯。下午茶包枝裝水一枝，如果想更加清熱，可以加$48柯打以山竹汁、花茶和無花果調製的水果皇后特飲，口味十分清爽，推介！

樹上熟貓山王、D24、黑刺......

鹹甜點一份就夠，因為戲肉是多種款式的榴槤肉。任食的榴槤肉全部來自馬來西亞彭亨州，每天樹上熟即時收果，24小時內新鮮空運到港。當中包括人氣貓山王，以及4至5款當日最靚的神秘榴槤款式。在我體驗當日，便有D24、竹腳、D101和極度濃香甘甜的黑刺。食完榴槤拼盤，各款榴槤會再分批次給客人任添，我便追加了D101和黑刺。

大抽獎送雙人吉隆坡機票

預訂Pier 1929「Monster Durian榴槤放題」，可以勁食啖啖榴槤肉之外，仲有大抽獎，禮物包括AirAsia香港來回吉隆坡雙人機票（名額4個），及多款由馬來西亞旅遊促進局（香港分局）送出的特色禮物，包括榴槤頸枕和榴槤斜挎包等，愈望愈想去旅行。

科幻打卡位及馬來西亞風市集

至於Pier 1929的中庭位置亦變身成「Monster Durian異想世界市集」，而且免費開放給公眾入場。當中除了有科幻感巨型榴槤供客人打卡外，還有貓山王咖啡、純素朱古力和榴槤冰皮月餅等攤檔，可以畀你假裝到咗馬來西亞shopping；然後順便到市集內的馬來西亞旅遊局攤位攞料，為外遊作準備，期待出發！