【旅遊】英國人去沙灘點解唔游水？ 呢樣嘢竟然多過太陽傘？
趁著暑假，我們專程去了中部最近的沿海城市 Skegness 來個小旅行。大家都知英國的夏天同陽光都好珍貴，難得 8 月天學校長假，有海灘的沿海地方都是熱門旅遊點。
呢幾日去過 Skegness 的幾個沙灘，不期然會同香港沙灘作比較，大鄉里觀察到以下幾點︰
- Wind breaks 比 sun umbrella 更普及！
香港夏天曬，去沙灘頂多租把大太陽傘或者自備小型營帳，我發現呢幾個沙灘除了有營帳 tent，更多的竟然是香港無見過的 wind breaks！Wind breaks 顧名思義係擋風，身處一個上午就已經覺得成件事好合理，因為沙灘真係好好好大風！大人齋坐陪細路玩，真係吹到頭都甩。Wind breaks 有大有細，最小型的 4 條柱 8 鎊起跳，成日去海灘的朋友必備！
2. 無沖身
香港大部份泳灘都有花灑沖身洗腳，沖個快涼又得，只想沖下身上腳上的沙也方便。英國海灘原來唔興有沖身，最多得個水喉洗下腳，而且都唔係個個海灘有。九成人都係用毛巾抹抹即走人跳上自己車，涼都係返歸先沖啦！
3. 無獨立更衣室
香港泳灘好多時廁所同更衣室係分開的，英國海灘如果有更衣室，大都係一兩格瑟縮在廁所內，可以想像唔多唔少有朕味，我會建議換定泳衣泳褲先出門。
4. 去海灘目的係曬太陽
英國的海灘水溫就算係夏天有猛烈太陽照射，一般體感溫度都只有15、16 度，午後曬耐咗可能有 20 度，但因為大風，我地寒底人絕對覺得游水係凍。因此，在英國海灘，見最多人係曬太陽，跟住係同小朋友玩下水射下水槍玩飛碟。反而見到有小朋友買定小網在岩石隙捉蟹仔、魚仔，比真正暢泳更多。
5. 周圍都係 Soft Whippy、Slush
海灘附近賣 soft whippy 軟雪糕同 Slush 思樂冰的食檔餐廳多到數之不盡，沿路行去海灘，最少都有 10 檔 8 檔，難得軟雪糕價錢都係 1.5 鎊起，思樂冰 2 鎊起，無坐地起價喎。
6. Tattoo 同駁髮
如果海灘喺正旅遊熱點，仲有機會有埋 Fake Tattoo 同駁髮。Fake Tattoo 包括印水紙印下圖案，亦有即畫在面上手上的 face/ hand painting。呢度仲好興駁上唔同顏色頭髮，原來英國女孩好鬼鍾意，唔怪一街都係粉色頭髮。
