【英國】校服單十幾項要買齊？ 女生著迷你裙、窄腳褲定中性西褲自己話事
8 月除了張羅暑期活動，就是要為 9 月開學做準備。英國公立學校無論中小學都無課本，可以慳番一大筆買書錢。反而係校服，如果唔合身或者升中轉校了，就係時候要買定。
去大型超市買平好多
家長會收到一份校服 checklist，裡面又有 blazer、fleece、pullover 等十幾項，究竟係咪全部要買呢？又係咪好似香港咁，全部要去校服公司買呢？兩個答案都係 No。雖然 checklist 有十幾項，一般可以向學校問明哪些是必需項目。恤衫西褲校裙等當然要買，但以上三項不需校徽的項目基本上是不需要在校服公司購買，家長可以去大型超市 Tesco Extra、ASDA、Sainsbury 等服裝部買，價錢平校服公司一大截。有要求的也可去 Marks & Spencer，質料較好，我最鍾意M & S 的免熨恤衫，洗完都唔多皺，可減省每星期熨衫的麻煩。
哪些必需在校服公司買
至於必須在校服公司購買的，一般包括校褸 (blazer)、校呔、指定款式的運動上衣。大部分學校對於運動服下身只要求海軍藍色或黑色短褲長褲，因此亦無需要在校服公司購買。由於好多學生都在暑假初湧去買校服，因此校服公司很多時建議先於網上落單再安排取貨。當然第一次買，唔肯定 size，就建議上門試身，尤其是校褸。一年裡，基本上只有 7、8 月校服公司一星期開足 6 日，其餘月份很多時一星期只開 3 至 4日，如果來到插班買校服時也要注意。
女生校服各適其適咩都有
我對於英國校服的最大謎思是女生校裙要求的彈性，同一間學校女生，半截裙可以有打褶、有直身、有長及膝、有短至 pat pat 長少少，女生又可以選穿長褲 (這個可能與英國主張 unisex 有關)，但長褲亦可以貼身如 tight pant、直身西褲款，真正各適其適咩都有。相對男仔西褲較簡單，但亦可以揀 regular、slim、skinny，就是褲筒個 cut 唔同，著得落有得揀，當然係 slim cut、skinny cut 型仔啲。
