【旅遊】英國人暑假鍾意去嘅歐版泰國即係邊度？酒店Full board/Half board又係咩？
8 月開始，成個城市好似靜下來，大概因為唔少家庭已經飛往外地旅行放暑假。香港人旅遊熱門地點係日韓泰台，英國人呢？法、意、西班牙、葡萄牙等鄰近國家固然熱門，但數 family friendly 啱小朋友玩而又可以讓大人真正放假的親子遊，土耳其也是三甲之選。
根據英國《The Guardian》報導，土耳其是其中一個消費最平的旅遊景點，以 1 英鎊兌近 22 土耳其里拉來說，拎住英鎊喺當地確係幾好使。另外，英國好多城市的機場都有班次飛土耳其，機程約 7 小時，算不上短，勝在方便，難怪每年有逾 250 萬英國旅客訪土耳其，其中沿海城市 Marmaris 更因為保留唔少英國文化又有靚沙灘而最受英人喜愛。
在盤算緊飛唔飛的時候，土耳其都是我 research 目的地之一，夏天時陽光與海灘，酒店有靚泳池，仲有大大小小 water slides，成個水上樂園，又有 kids club，單是酒店內就有唔少活動，成個感覺係好泰國 resort 啊！小朋友大把嘢自己玩，大人可以盡情 hea，唔需要追景點，這才是假期！
上網訂酒店 package 好多都分All inclusive、Full board、Half board。All inclusive 顧名思義係全包，除了房間，還包一日三餐，整日隨時飲杯嘢食小食都不另收費，仲可以任用所有設施 （有些連按摩都包埋），係香港人熟悉的 Club Med 玩法。Full board 主要包房間、早午晚三餐，不過就大多不包日中飲品與小食，個別設施可能需付費。至於 Half board 就是只包房間、早餐同晚餐和一般設施。單看價錢當然以 All inclusive 最貴，至於選邊款，好睇個人需要，打算長留酒店又好飲番杯的，All inclusive 應該可以回本；至於我呢種食得唔多又唔多飲得，鍾意午後出去走走做少少遊客觀光的，Half board 似乎較適合。
雖然由於時間關係，今次 book 唔切土耳其之旅，但這個名字已經 on top of my list。
