【移英】10 大入學問題｜移英讀幾年級？可唔可以留班？課外活動點收費？

UK_nottsMama

移英港媽生活分享

2022-09-05 08:00

生活專欄

內容

近日跟不少香港朋友傾開，對於小朋友來英入學原來都有好多誤解，趁住 9 月學年新開始，就以下 10 個常見問題分享一下。不過，英國地方大城市多，唔同 Council 的做法或有出入，因此只是一個概括的分享。

1. 小朋友今年來英應該讀幾多年級？

這是最常問的問題。英國公立學校一般根據出生日期收生；出生日期由一個年度的 9 月1日至下個年度的 8 月 31 日為同一學年計。以往，港媽愛把小朋友變「大仔」，例如本來 2008年10月出世的，於2022-23 學年應該升中三，卻刻意讓他們變「大仔」讀中二。而一般來說，香港的學校對於年齡無大所謂，一班中有「超大仔」有「細仔」亦好常見。像以上例子，2008 年 10 月出世的港孩就算香港只是完成中一，來到就要讀 Year 9 （中三）了。附 2022-2023 年度入學年齡表作參考對照。

2. 擔心小朋友英文跟唔上，可以要求讀低一級嗎？

好多媽咪驚小朋友英文跟唔上，又或者 7、8 月出生是這裡的「細仔」，大多想孩子 repeat 一年準備好啲，但英國公立學校普遍都唔會受理，因為英國學校就算成績唔好其實都唔興 repeat。反而如果學校發現小朋友跟唔上，會有特別安排協助小朋友學習。雖然我亦聽過有個別情況可讀低一級，但並不常見。

3. 幾多歲來英讀書最好？

這個問題幾因人而異，小朋友越細當然越易融入，但中文可能唔太識，唔同家長有唔同選擇。我認為沒有最好，只有稍差的 timing。例如小朋友已經 16 歲，在香港可能讀完中四，但此時來到英國已經是 Year 11 （相等中五），好多學校其實都唔會收，反而建議你讀 Sixth form 中六再自修考番 GCSE（等同香港以前會考）英數兩科，又或者直接上 college。但對於只完成中四程度的香港學生來說，直接上 Sixth form 可能比較吃力。當然讀私校還是可以入讀 Year 11，但要立刻追趕考公開試亦唔容易。

另外，小學雞想趕得切公立中學派位，最理想是 Year 6 九月開學時已順利入學，這樣就可以趕及 10 月31 日前參加派位，入到心儀中學的機會自然比插班大。

4. 讀 College 係咪要俾學費？

英國推行免費教育至 19 歲，因此很多 19 歲以下青年入讀 college 仍然不用交學費，公立學校兩年 sixth form 課程亦毋須付學費。

5. 插班時間有無限制？

基本上任何適齡兒童，council 都需要安排學位，這樣看，插班時間是無限制的。以同一區來說，一般小學多中學少，因此要插班中學肯定比小學難，如果小朋友已達 Year 9、Year 10 之齡，又想派到又近又好的學校難度就更高，最好預鬆時間。

6. Good VS Outstanding School

香港有 band 1至 band 3 的中學排位，英國只有由 Ofsted（英國教育、兒童服務及技能局）評核的 Outstanding、Good、Require Improvement、 Inadequate 四個級別。評核的範疇包括教育質素、學生行為表現態度、個人發展、學校管理等。要留意，學校公開試成績基本上無直接納入評核，因此 Outstanding School 公開試成績不一定比 Good School 優勝。另一點需要留意的是，有些評核已經是6年、8年前做，唔 update 的評核某程度上未必反映到學校現況。

7. 應該搵屋先定搵學校先？

香港朋友的兩難︰搵到屋租近心儀學校又驚學校無位，問到學校有位又未必同區搵到屋。只可以說，如果要求只係有書讀，一定係搵屋先；無屋企地址，連報學校第一步都無法開始。而且只要你唔嫌遠，有些中學是唔介紹收跨區學生的，大前提係仲有無位。

8. 學校 Oversubscribed 係咪完全無機會？

學校已經 oversubscribed 滿額是否表示無機會入讀呢？其實不一定，試過有 oversubscribed 的學校突然有某個年級的學生退學，就有位置騰出，而 year 7 有位又不代表 year 9 有位。我認為如果是心儀的學校，絕對值得照報，甚至試下 appeal，如果原因力度夠強，學校也會取錄，我兒子正是 appeal 入現在的天主教中學。

9. 想入好中學必入聯繫小學？

對，由於英國小學沒有呈分試，中學派位不看成績，基本上聯繫小學的學生是可以直上聯繫中學的。由於中學每級班數人數比小學多近 4 倍，每班人數亦比小學多，因此一間中學通常可容納 2 至 3 間聯繫小學學生及其他學生。如果小學 Ofsted 的評級唔太好，但卻可以直升港媽口中的 band 1 中學，唔少人都會揀先入呢間小學。