謝雪心憶ATV多靈異事跣親同神明有關 胡慧沖晒冷做幕後時所見所聞
發佈時間：16:30 2023-01-17
曾任職亞視（ATV）幕後、負責皇牌節目《今日睇真D》撰稿員的「鬼王」潘紹聰，其社交頻道《恐怖在線返去舊事嗰度》新一集細談亞視位於廣播道的舊址，當中的一些鬼故事，曾在亞視工作的「泰國通」胡慧沖及謝雪心更現身做嘉賓。
【點擊睇謝雪心胡慧沖講靈異故事】：
謝雪心於1995年加入亞視，她與潘紹聰重遊舊地，二人之後在車上大談聽過的鬼故事：「當時有個女監製同我講，『心姐，你知唔知道呀？我行樓梯，忽然間見到一對腳，對腳去到膝頭哥對上，冇上身㗎』，嘩！嚇到我吖。」心姐記得當時亞視舊址當年的門口好大，應該是風水嘢。她印象中曾遇過靈異事件：「化妝間再入啲有個位放道具，當時有個位供奉一個神像，但又冇人裝香，我返親公司都會上香，嗰度有個錄影廠，我一隻手拎住化妝箱，另一隻手拎住好多嘢，忽然間跣腳，好奇怪，跣腳嗰陣好似慢慢有人托住我咁，後尾啲人話係娘娘保佑我，我都好感恩，多謝娘娘保護，但我唔知佢係咩神，又唔知邊個放喺度。」
胡慧沖於1985年任職幕後時，負責節目《我愛香港》撰稿員，之後因喜愛泰國經常往返當地旅遊，就被委派到節目《乜都有》系列做主持，他慶幸工作期間未曾遇到靈異事件，不過就聽過另一節目《今日睇真D》主持盧希萊描述：「當時佢男朋友豹哥係（亞視）司機，有一朝好早，（豹哥）要返公司接藝員出去拍劇，去到服裝間，見到有個著古裝嘅人坐咗喺度，同佢講『乜咁早呀？一陣間上車喎』，嗰個人冇啋佢，豹哥行返出去，再返入服裝間，就見唔到嗰個人，佢再問其他人，根本冇人入過嚟，事後豹哥話畀盧希萊聽，盧希萊就話畀我，我覺得豹哥冇理由講大話，可能係真人真事，其實亞視舊址都多嘢（發生）！」
多年來亦有不少鬼故事在洗手間發生，胡慧沖表示聽過已退休的攝影師的經歷：「喺地下嗰層嘅廁所小解，前面有個窗，見到有個頭升起，不過佢自己殺氣大，又大隻，所以唔驚。」
【其他文章】：
雯雯疑與張致恒正式離婚做單親媽媽 愧對3個仔：不能給你們完整家庭
42歲葉璇凸腩直播搲腳趾剪腳甲 遭黑粉謾罵數小時靠一招絕地反擊
陳美詩夫婦現身飯局驚現倒模級夫妻相 孫耀威V煞臉尖過老婆似美男子
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
