麥子雲·專訪｜68歲升呢執董搞創科！爆徐克鬧阿姐事件內幕 讚梁朝偉極有武打天份
發佈時間：19:00 2023-02-15
闊別香港影視圈22年的第一代「御用奸人」麥子雲，近日在電影《毒舌大狀》飾演保安「陳球」而備受關注。由70年代至今演過不少劇集及電影的他，坦言意想不到各界反應熱烈，不過此次演出卻未有勾起其戲癮，一向「佛系」的麥子雲說：「任何事我都淨係享受過程，從來做生意、做戲、做人都好，唔會刻意尋求想做乜嘢，係好隨意隨緣，亦唔會因為戲多咗而高興，或者而家電影收得就搵多啲嘢做，加上我自己時間有限，始終已經轉咗方向。」日前他接受《星島頭條網》專訪時，除分享轉行後的現況外，在回顧演藝生涯點滴期間，更大爆圈中兩大巨星鮮為人知的往事。
【相關文章】：麥子雲·專訪｜御用奸人靠惡樣覓得初戀嬌妻相愛半世紀 「擋飛仔」擦出愛火愛黏女強人老婆
【點擊睇麥子雲演藝及隱退經歷】：
自幼習武的麥子雲70年代加入邵氏訓練班，早期於電視台擔任舞蹈員及武術指導，後來獲TVB正式簽約成為藝員，曾參演《楚留香》、《天龍八部》、《射鵰英雄傳》及《神鵰俠侶》等多部劇集。昔日跟麥子雲合作過的巨星多不勝數，尤以影帝梁朝偉（偉仔）、劉德華、鄭少秋令他印象最深刻，他更點名大讚偉仔極具武打天份，「當時佢一張白紙，跳舞、功夫都冇學過，但打得似模似樣，真係好犀利。」談到兩人合拍不少動作場面，惟私下的交流不算多，麥子雲直言患「社交恐懼症」的偉仔當年已享受獨處，「偉仔個人唔鍾意互動㗎，佢可以同你單獨好好傾，但佢唔鍾意成班人傾。」
至於影響麥子雲最深的圈中人，其中一位便是殿堂級導演徐克。除大讚對方運用鏡頭的手法充滿創意和美感外，麥子雲稱，最記得合拍佳視武俠劇《金刀情俠》時，完全體會到徐克一絲不苟的做事作風，他憶述：「佢嗰時已經嚴謹到不得了，試過鬧梳頭阿姐『前面梳得好靚，後面唔得』，點知阿姐話唔緊要啦都睇唔到，阿姐根本唔了解導演拍嘢鍾意拉背（Over the Shoulder Shot）。」麥子雲續爆，徐克擁有「長期不眠不吃」的能耐，雖然跟要求極高的人合作頗辛苦，但能夠從對方身上學習處事的態度，他也深感榮幸，「其實任何巨星都好高要求，無論對自己定對任何一場戲，我好佩服佢哋，尤其喺電視台冇得瞓又要記對白又要打，但佢哋仲可以堅持盡量做到最好，呢啲體能同意志唔係人人做到。」
麥子雲無意買磚頭送寶貝女 升呢執董自稱未發達
自問天份到頂難以衝破框框，加上重複的戲路令他意興闌珊，拍畢2001年TVB劇《尋秦記》後，麥子雲便淡出幕前，轉戰內地開闢舞台製作事業，逐漸生意愈做愈大，近年他還撈過界搞創科，並將「武術融入動畫特技」的舞台特效引入香港。68歲麥子雲活到老學到老，他透露花了五、六年時間，鑽研透明及3D屏幕等視覺上的嶄新技術，「我都學咗國內人嘅諗法同做法，預視之後五年發生咩事，冇五年都最少睇三年，好似舞台製作咁，我哋以前首創嘅威也、煙花係主角，三年後已經變配菜，而家煙花都唔用火藥，改用嘅煙花機咪創科嘢囉。」
現為恩溢國際發展有限公司執行董事的麥子雲，坦承比起當年電視台的2,500元月薪，轉行從商後確實收入大增，不過他謙稱至今仍未發達，更從沒置業的念頭，「我同錢有仇，我唔儲錢又從來唔買屋，淨係將啲錢用嚟做生意，就算以前有幾次可以買屋，甚至首期都唔使畀就買到，但我都冇買，因為我唔鍾意炒賣文化同賭博。做生意我就從來唔睇商機，係興趣行先，就算未必賺錢，但都享受個過程。」並謂送樓予子女是上一代的守舊觀念，認為培育他們讀書成才更為實際，故麥子雲笑稱最大投資便是四位千金，「賺到四個女就係我嘅資產，有層樓望住又如何，都冇愛意嘅，我唔會因為升幾多、賺幾多而好開心。」
採訪：黎寶倫
攝影：朱偉彥
場地：凱旋門私房菜
【其他文章】：
葉璇開直播忽伸手入褲搲下體神態自若 無洗手轉頭食榴槤讚好好吃
55歲馬詩慧透Bra晒名模零走樣身材 硬撼二女王麗嘉「週期性」噴血裸照
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
