CoCo李玟逝世丨老公趕及見最後一面胞姊嘆飽受抑鬱腳患折磨：唔知咁嚴重

更新時間：13:00 2023-07-07
發佈時間：13:00 2023-07-07

樂壇天后李玟（CoCo）前日（5日）驚傳在家輕生離世，終年48歲。胞姊李思林昨日（6日）接受《星島頭條》電話訪問時，澄清李玟不是割脈，死因留待法醫公布，並透露妹妹的人生死穴是「感情」。而她接受《TVB娛樂新聞台》的訪問亦於晚上播出，當中更詳述了李玟病重時的細節。

【相關閱讀】：CoCo李玟逝世丨胞姊李思林爆病情4天內惡化意外揭鄭欣宜疑陷憂鬱症之苦

【點擊睇李玟病重細節】：

有消息指，李玟今次事發在母親與家姐的山頂寓所，事發時加拿大籍富商老公Bruce Rockowitz並不在港，但獲悉後翌日已即時返港。李思林向《TVB娛樂新聞台》透露：「Bruce有趕返嚟香港見（李玟）最後一面，我哋亦都有要求醫生能夠做到嘅嘢，全部都幫我哋做，就算醫生已經覺得幫唔到，即係基本上佢已經唔喺度、只係維繫佢嘅心跳同呼吸，我話就算得一線生機都要做，因為媽咪喺CoCo出世時已經冇咗老公，佢80幾歲，一個咁老嘅太太，希望大家明白，同埋畀少少愛心呢位老太太，唔到最後一秒都唔好放棄。」她又感激所有醫護人員，盡最大能力救妹妹。

提到李玟半年前確診乳癌，雖已接受手術切除腫瘤並痊瘉，但仍一直飽受腳患及抑鬱症困擾，李思林說：「佢做咗腳嘅手術，因為係一個非常大嘅手術，唔淨係大腿換上支架，仲有整個左邊盆骨都係支架，你話有冇好大嘅痛楚或後遺症？係有嘅，譬如痛、麻痺，一個正常人長期處喺呢種痛楚中都會有影響，好多嘢加埋都會影響佢心情或情緒，反而呢個抑鬱病愈嚟愈嚴重係真。」她深吸一口氣續說：「我唔知道原來嚴重得咁交關，其實我哋都係之後先知佢有睇醫生、有努力（醫病），真正嘅CoCo係不停同嚴重抑鬱嘅CoCo長期鬥爭，呢種鬥爭係最折磨佢，知道佢而家咁快樂，我就安心。」

慾致電慰問「失蹤」鄭欣宜

此外，「失蹤」兩個多月的鄭欣宜早前被誤傳死訊，李思林指李玟即使病重也很關心對方：「佢喺最後一日嗰朝早起身同我講佢諗起欣宜，妹妹記得欣宜細個有問過佢攞簽名，佢好關心欣宜，好想打個電話畀對方，我叫佢自己努力，好番之後唔單止可以幫助欣宜，亦都可以幫到好多人，你可以感受到佢係一個好有愛、好鍾意將正能量傳遞畀人。」

李玟今年先後在社交網分享多張暴瘦、腳傷及身上吊「引流袋」的照片，其後再傳她與結婚11年的加拿大籍富商老公Bruce Rockowitz婚變。據悉，李玟與Bruce已分居兩年多，目前正在辦理離婚手續；而去年李玟確診乳癌而動手術，全程由兩個胞姊一直陪伴，雖然Bruce獲悉此事，但未有陪伴太太，反而選擇外出旅遊，身邊有好友曾不斷苦勸她離婚，但她完全聽不入耳，令好友十分心痛她。

【24小時求助熱線】：

生命熱線︰23820000
明愛向晴熱線：18288
東華三院芷若園熱線︰18281
社會福利署熱線︰23432255
利民會《即時通》：35122626
撒瑪利亞會熱線(多種語言)︰28960000
香港撒瑪利亞防止自殺會熱線︰23892222
賽馬會青少年情緒健康網上支援平台「Open噏」：www.openup.hk
醫院管理局精神健康專線(24小時精神健康熱線諮詢服務)：24667350