【頭條獨家】強尼力推《學神》拋胸飄移彈起 32D李賢出撃唔露點就得

更新時間：14:44 2021-07-03
發佈時間：00:03 2021-07-03

Leanne本身做開event planner，近年亦有主辦演唱會，今日開騷的ToNick她亦是搞手。

李賢（Leanne）憑《學神出沒注意》拋胸玩飄移，大搶「嘉倩BB」（陳嘉倩）風頭被網民留意，28歲的Leanne本身其實做開幕後，疫情零工作下試玩幕前，仲得強尼親自引薦拍《學神》。胞姐是演員李敏的Leanne，拍過網片𠵱家有機會拍埋電視都想繼續發展，節目中靠性感出位的她，亦唔介意再行性感，只要三點不露就冇問題，仲話：「性感唔緊要，大家睇得開心就得啦！」講到想合作男對手，Leanne首選伯樂強尼；強尼回應時被問到Leanne想行性感就笑住話：「佢IG都話畀咗大家聽係嘅！」兩人似乎真係幾熟喎！撰文：杜淑霞攝影：譚壹致髮型及化妝：Irene @makeupboobooboo 場地：場地：The AIR(The ONE)

Profile：中英文名：李賢（Leanne）生日：1993年6月18日三圍：32D-23-33身高：158cm體重：44kg

跟圈外男友拍拖半年的Leanne，講明性唔性感由自己話事，但適當時候會尊重男友感受。

對於《學神》時頭集便性感出位，Leanne解釋絕非刻意鋪排，「咁啱我之前襯咗呢一套衫，post咗上IG大家都話好睇，PA（助理編導）打嚟話過兩日拍飄移，咁就用呢套啦！拍攝去到中途，自己都覺得有少少唔對路嘅，見到大家唔係着到咁，如果有睇節目嘅朋友，都會見到我有啲寒背，因為突然覺得係咪勁得滯呢！？寒吓背先，等件拉鍊衫可以遮番落嚟，但後尾發覺冇用，唔緊要啦！大家睇得開心就得啦！引下大家入嚟支持個節目。」

Leanne着住呢套衫拍《學神》飄移，結果拋晒胸搶晒鏡。

Leanne感激強尼引薦拍《學神》，她亦想再跟對方合作偷師。

搶唔到「嘉倩BB」風頭

對於之後即刻有報導道指Leanne搶晒女神「嘉倩BB」風頭，她就笑笑口話：「BB係搶唔到風頭嘅，BB始終都係BB！」不過她承認節目出街後，確實多了很多人留意，亦加強了她入行決心，「之前都會有個疑問，係咪好適合呢行，我又未拍過節目、劇集同戲，得唔得呢！？《學神》出嚟嘅效果，我自己收番嚟都唔錯，導演都好喜歡，即刻有另一個節目搵我拍，係個文化節目嚟，我負責去訪問人。」對於繼續行性感，Leanne絕對冇問題，但要睇場合，「我出街冇乜特別，鍾意低胸咪低胸，但如果去探訪長輩嗰啲就裝重啲，喺呢行發展落去都會睇情況而性感，我唔抗拒性感呢樣嘢，都係好正面氣質嚟，只不過唔好令人覺得你係咪都露囉！所以《學神》我係頭幾集叫做性感咗少少，之後我有着樽領。將來如果拍劇、電影角色需要我都會唔會介意性感，但三點不露，我諗我媽咪應該心臟承受唔到。」

講到合作男對手，Leanne首推引薦她拍《學神》強尼，「強尼同家姐（李敏）幾年前拍咗Viu一個節目《對不起標籤你》，《學神》導演同監製，強尼之前都有介紹過，今次拍《學神》佢就同監製講『可以試吓搵Leanne喎』。合作就梗係強尼啦！其實我有好多artist我都好鍾意嘅，但你話近啲都係同強尼大哥合作，無論係拍劇定做節目，我記得有次同佢講我要同你拍劇，佢本身個才華真係好高，同埋佢好肯畀機會同教後輩，同佢做嘢會學到好多囉！（做情侶？）睇劇本，問吓佢O唔OK，驚佢唔想！」對於Leanne恨再合作，強尼回應話：「啱啱新入行做戲，有個熟人有安全感，呢個我可以理解，不過3月之後佢就不停想搵唔同嘅人合作㗎啦！」他又謂Leanne嚴格來講新唔晒，「佢拍網絡嘅嘢都一段時間，幕後都做過，佢家姐又做呢行，都算半隻腳喺呢行入面。」對於Leanne想行性感，強尼笑言：「佢IG都話咗畀大家聽係嘅。」