獨家丨「親生仔」王鋒 KC Nathan絕密心底話《造星V》十強為負評大平反

更新時間：07:00 2023-07-05
發佈時間：07:00 2023-07-05

《全民造星V》總決賽將於16日舉行，投票佔評分50%，網民支持相當重要，不過節目播出七星期以來是非不斷，特別是被網民封為「ViuTV親生仔」的王鋒、KC和Nathan最萬箭穿心。本來插足全程《造星V》的改舞事件稍為丟淡，但上周六澳門十強節目講遺憾環節再度燃起火頭，火勢更令Tsoul及KC慘被惡評洗版，就算急放足本版都難以救火。《頭條日報》收到消息，原來十強節目在《造星V》仍未播出前已拍攝，在未知《造星V》如何被剪輯播放的情況下，囝囝們被製作組強行要求回應，加上綜合各大網上平台的毒舌評論。在拉票期間，本報特別畀機會十強，就所有批評作出大平反。採訪：杜杜攝影：Stanley

《造星V》十強Lyman、Ash、KC、Tsoul、Nathan、Taco、王鋒、Snoopy、亨仔和希晉，出席完周日下午的拉票活動後被傳媒輪訪，眾人面露倦容。

王鋒被嚴重網絡欺凌冇晒光彩
堪稱《造星V》「負評王」及「ViuTV首席親生仔」，昨日27歲的生日的王鋒，因在澳門十強節目喊住講返改舞事件，被網民斥貓哭老鼠，一眾鍵盤戰士要求他退賽之聲不絕。其實當時《造星V》未播，王鋒經兄弟們鼓勵講返改舞事件講到流晒眼淚變晒聲，相信佢嘅喊係來自內疚及懷疑自己為人，絕非刻薄留言所講喊俾網民睇博同情。

王鋒在十強節目爆喊重提改舞事件，網民鬧佢貓哭老鼠。

而被負評折磨及被嚴重網絡欺凌到冇晒光彩的王鋒，承認事件好難補救，「其實都冇話平反，的而且確我係做錯咗，其實我都想去補救，無論係關係（跟阿澤)，大家對我嘅諗法，但係最主要都係道歉為先，其實係我同佢之間嘅事，我有不斷同佢私下溝通，都希望大家嘗試從我嘅立場同角度去睇，好多人有佢哋嘅諗法，好難去說服佢哋，而呢一刻做好個表演，做我自己最鍾意做嘅嘢。」

至於會否退選平息民憤？王鋒認為唔可以拉埋嚟講，「反而我會更加珍惜呢個機會，我都希望有一個更好嘅我，同埋畀大家睇到我嘅進步或者真誠。」對被指ViuTV親生仔及契仔，王鋒認為是剪接上的錯覺，「我睇到啲comment話某啲人成日出場會拍手，有啲成日企C位，我會覺得呢啲係幸運，自己好彩，其實大家都有實力，覺得呢個稱呼被大家定型咗，我就唔係咁睇嘅。」

叫王鋒講吓最難受的評論，「其實每句都好難受。」

KC「邪念」論被誤會覺得受傷
因為女友是Win Win，KC（黃家灝）被指唱歌走音，Only跳舞叻都可以由頭帶到尾，更因比賽期間有大量鏡頭而被封「親生仔2號」，他重申唔覺節目組對佢特別好，點剪輯亦唔到佢決定。「比賽入面淨係做好自己，我意思係阻唔到佢哋咁樣講，當然我冇參與剪接啦！所以我絕對係作為一個參賽者去參與呢個比賽。」

因Win Win男友身份，KC甫參賽已開始被網民攻擊。

問到努力比賽慘被轉移視線，KC坦認有少少唔開心，「覺得都有少少個集中點去咗個事情嘅真偽，有啲人可能好firm咁講，有啲人好猜測咁樣去講，咁我覺得都要睇我表演，都要睇我create嘅嘢，你哋覺得唔夠好或者有咩唔好我都會聽。」

講到澳門十強節目的言論，KC無意判斷誰對誰錯，「邪念係勝負帶畀人諗多咗嘅嘢，喺我嘅世界真係只係得做好自己，而呢個係份內事，所以點解當初我話呢件事係悲劇呢，就係因為勝負呢樣嘢分開咗佢哋。」對於發表意見被狠批，KC覺得被誤會，「但係is OK，我只係喺鏡頭前講咗一啲對呢件事嘅想法，每個人都有佢嘅答案，其實當下講嗰番說話，大部份我係表達一個感嘆嘅感覺。」

KC在節目表達意見被圍插，坦言有少少受傷。

《造星V》播映共七個星期，KC一直被網民重點關注，問他適應入行未？他坦言，「我都仲諗緊我係要適應呢樣嘢定係唔要適應呢樣嘢，好多人喺我ig po講好多佢哋嘅諗法，我知道自己想講啲乜嘢諗緊啲乜嘢，我唔會怪佢哋，清楚自己諗乜就OK。都係嗰句會有少少受傷，但係我會明白。」

KC認為努力比賽及為表演做創作，卻無奈被是非模糊焦點。

Nathan認甩舞學識自戀撐自己
比賽喊足全程的Nathan（魏念恩）同樣周身箭，除女友離世事件外，40強跳舞BATTLE甩舞要望隊友，以及被指得個樣及打鼓冇力。貴為連登仔的他笑言睇晒有關負評，仲樣樣都想回應，承認甩舞之餘更Proud Of喺連登經常見到自己的甩舞Gif，覺得炸裂的他興奮解釋，「我唔係望佢哋舞步，係覺得要同兄弟有眼神接觸，但就係望嗰吓甩咗嘞！」掛住同班兄弟Chill的他亦滿意自己表現，「講真我係炸嘅。」（有工作人員唔認同）Nathan沒好氣，「入呢個節目第一樣學嘅係自戀，瘋狂讚自己，呢個世界、節目太多負能量，自己都唔撐自己，冇人會撐你。」

Nathan（右一）因想同隊友交流而分心甩舞。

提到Nathan得個樣，亨仔突然插入：「你就好啦有樣！」全場爆笑！但Nathan對此就唔認同，「我就唔覺得我係得個樣，我識玩樂器啦，我跳舞跳到吓啦，我識好多技能，我識韻律泳，我攀石有牌啦，總之都係嗰句，我改變唔到每個人嘅睇法，有啲訊息我會接收，有啲訊息我會笑。」不過他認打鼓不及Jason Loi犀利，「以前夾band都知佢夾咩band，佢亦都去好多比賽做評判，我冇將自己同佢比較，亦比較唔到，我亦都視佢為學習對象，呢啲我承認，亦係我會接收嘅評價。至於話我打鼓細力，咁我下次打鼓大力畀你睇。」

Nathan在澳門十強節目指David患情緒病，他出story認錯指誤解對方。

對於同樣被指是ViuTV親生仔及契仔，Nathan百思不得其解，「我究竟喺邊度俾人契，我諗極都諗唔到，我喺呢個過程裏面，究竟幾時受過呢個親生仔嘅待遇，哈哈！但係我覺得有noise都係好事嚟，起碼有人講囉！」提到一樣負評纏身，Nathan承認有唔開心，「私人事情俾人不斷拎出嚟提，一定唔開心，因為對我嚟講係唔開心嘅事，不停咁提一定hard feeling，其他嘢我會接受，親生仔嗰啲睇完真係笑得好開心。」笑他既然開心不如做埋上契儀式，成程訪問感覺好百厭死仔Feel的他轉數好快，「上咗契真係俾人話係契仔，𠵱家對我嚟講係契仔問號，我仲諗緊有咩因由俾人睇到我係契仔。」

對被封「親生仔」諗極唔明，Nathan笑言:「幾時受過呢個待遇，哈哈！」

Nathan承認暫時跳唔到舞，但佢鍾意跳舞會努力進步。

Tsoul認被鬧不快負評令人進步
Tsoul（田曜誠）因在十強節目批評阿澤台上申訴，其IG被洗版式留言狂鬧，被指一鋪清袋的他，雖然有出Story解釋剪接問題，但網民唔收貨，更呼籲一票不投Tsoul。他稱是節目組表示一定要答，「我控制唔到人哋點諗，知道事實嘅就知道事實，但係我哋唔會將事實擺上公開場合度講，我覺得冇需要，要講嘅已經講晒。王鋒臨時變陣係唔啱，我都好坦白同佢講佢係唔啱，節目組時間問題，剪接問題冇擺上所有bite好正常，想提各位係一個節目，唔會包含咁多個鐘拍嘅嘢上去，如果大家要惡意誤會我意思，我真係控制唔到，本身想表達王鋒係做錯咗，令到阿澤講咗出嚟，就引發咗咁大件事出嚟，呢個係佢哋兩個人嘅事，我哋旁人只可以聽囉！我哋畀意見都幫唔到佢哋兩個真係好返，我知自己為人係點，我身邊朋友都知我為人，有網民想攻擊我is ok，我覺得反而有攻擊就有noise𠻹！」

Tsoul在節目發言被剪輯，令網民誤會他插阿澤。

Tsoul因澳門十強節目言論，ig被洗版狂鬧，他即出story澄清。

因為十強節目剪接問題令Tsoul被狂轟，他冇後悔講出嚟，「嗰刻係一個問題嚟一定要講，呢啲唔會剪出嚟畀大家睇，我同KC都係跳舞人，喺嗰刻因為節目嘅需要係要回應，我同KC其實想表達嘅嘢都係因為王鋒做錯咗，令到阿澤有呢啲action，我身為紅組隊長好坦白講，我嗰時，甚至係之後，都係偏向聽阿澤嗰邊多啲，因為我同佢同組，聽佢呻，但我聽完都幫唔到佢，呢啲係佢兩個人嘅事，作為隊長，我做咗我嘅責任就係聽佢訴苦，令佢feel good返少少，我可以做就係咁。」他承認有為洗版事件不快，但唔擔心投票成績，「我都係靠實力同作品說話，負評係令自己進步，人身攻擊就會過濾。」

Tsoul被剪接組嚇親，完訪問後向記者溫柔提問：「你哋會出晒嗰訪問㗎呵？」

Lyman自認不足零負評唔係好事

零負評的Lyman（香胤宅），認為太多負評唔好，但只得正評亦未必係好事，更自認有好多不足，「其實有好多嘅，唱歌啦！的確冇亨仔、希晉、Nathan、Ash嗰啲水準，跳舞其實都係嘅，我跳到拉丁舞，跳到少少爵士舞，但係好Lucky識到Dai Bon（84號胡成邦）學到唔同嘅爵士舞、jazz funk，同王鋒、Adams同隊，有埋locking，唔同commercial 嘅舞種，所以我的確仲有好多嘢要學。」

Lyman參賽以來一直被評高水準，但他依然覺得有很多不足。

問到被睇好奪冠，會唔會不斷改決賽項目？Lyman收起笑容，「改內容就冇嘅，但對自己嘅要求的確係高咗，因為做得public figure你要有個standard，做樣樣嘢都好好睇睇，多咗人支持你的確係有個責任。」

被封民選冠軍的Lyman零負評，反而對自己要求更高。

亨仔認同網民批團體賽隱形冇平反

亨仔（陳鎮亨）就被批評首輪表現出色，但團體賽隱形，是險入十強，他表示絕對認同，唔需要平反，其他囝囝忍唔住笑，「但係我非常開心，係咁多round可以試到好多嘢，你叫我無端端跳舞冇可能，我咁嘅款，跳唱又試咗，平時冇可能會跳唱，夾band又夾到，我本身又冇band又冇盛，所以無悔險入十強，真係冇平反。」

亨仔最開心比賽有很多新嘗試，譬如可以跟一班兄弟夾band。

對被批評，亨仔睇得好透，「咁我覺得如果本身已經做得好好，我就係明星，我都要接納自己有好多缺點，我有睇好多意見，我Pre round做得好我都認同嘅，之後好多意見，都有過濾分析，佢哋都講得好啱嘅，我𠵱家唱嘅發展方向都好單一，玩《造星》之後都有好多唔同嘅嘗試，所以都有所得着，能夠成功俾我入到十強都非常之慶幸。」

因為眼濕濕，被兄弟笑佢「眼瞓啫」的亨仔，認為入咗十強已無憾。

Snoopy自覺廣東話大進步講粗口好叻

Snoopy（詹仕偉）被指廣東話冇進步，遭質疑投入度，他就在Tsoul瘋狂提水下努力用廣東話回答，「我廣東話好厲害，進步好多，我講粗口好叻，你又唔知呀！」他澄清非投入度不夠，「我上一Round自己寫歌、排舞，排全部嘅表演。」問到如果真係贏咗，會否留港發展？他繼續邊講邊用眼神向Tsoul求救，「我唔知呀，順其自然。」再問贏咗比賽先再諗？Tsoul同Lyman一齊教佢答，「係！哈哈！」當Snoopy聽到記者再問下一位，即表現出一身鬆晒，好好笑。

Snoopy努力講廣東話，講唔掂就用眼神向Tsoul求救。

Snoopy不認為投入度不夠，因20強演出全部自度。

Taco被指冇進步覺得贏得唔乾淨
好多聲音指Taco（黃泓祖）在20強比賽冇進步，更替Ritchie不值，他也認同對方很出色，但就否認沒進步，「我覺得Ritchie嘅表現好正，佢哋覺得我冇進步嘅原因，係因為我用返同一首歌嘛！嗰首歌我就當佢有兩部份，我只係喺海選嘅時候表演咗前面嗰part，我冇表演到後面嗰part，而我想喺20強用返呢首歌，因為呢首歌好簡單介紹咗我係邊個，我有咩心態，有冇進步？我覺得自己有進步㗎！我有加咗少少舞蹈落去，網民覺得我係贏定輸唔關我事，我諗係裁判嘅口味啩！佢揀咗我，我只會係OK收到，我去準備下一round，所以我冇乜諗法。」他坦認有唔開心，「一定有，好似贏得唔乾淨咁，但係人哋揀我一定有佢哋原因，所以我都要相信自己有啲位係好，所似佢哋先會咁做。」

Taco唔認同20強演出冇進步，重唱Pre round歌曲亦有原因。

Nathan插口：「親生仔，呢個先至係親生仔！」Taco即刻接到，「我不嬲都話我係親生仔，我跳出嚟𠻹，咁個個話我Rap，又話似泰迪羅賓，但係我覺得冇問題。」記者問他是否想做親生仔？Taco答得坦白，「我想做㗎！咩叫親生仔？你有料咪可以囉！我嘅角度係人哋會畀咁多鏡頭你，咁多責任你，你有料你做到嘛！咪出嚟認吓自己叻囉！」（全場起哄）

Taco好想做ViuTV親生仔，「人哋畀咁多鏡頭、咁多責任你，有料先做到嘛！」

希晉認怕醜符碌入10強決賽有驚喜

希晉（王希晉）同樣被指隱形，符碌入10強，「還我Owen」講到𠵱家，自認怕醜的他承認隱形，「我覺得隱形係梗嘅，因為我對住鏡頭好易會怕醜，好容易唔講嘢，表演上我同KC佢哋一組，兩個跳唱一個夾band，其實前兩個回合或者Pre round，做唔到好shine嘅位，總之唔係自己最擅長嘅嘢，人哋話我隱形我真係隱形，我只想好似Tsoul話齋用實力，入咗決賽呢件事係改變唔到，一定係全力以赴，到時你哋睇到我現場表演之後，你都覺得我係咁樣都冇嘢好講。」

網民叫希晉還返個位畀Owen，他未有被反對聲音打沉，叫大家等睇佢表演，「到時見啦！」

對於負評，希晉話聽到好興奮，「呢啲說話完全攻擊唔到我，我覺得有唔好嘅說話先好，先會push到你，如果成個人生都係順風順水，我覺得冇意思，反而愈多人憎我愈隱形我就慢慢捱囉！到最後捱到呢個位畀你哋睇，到時見啦！」

希晉承認面對鏡頭勁怕醜，經常變隱形人。

Ash眼濕濕解釋點解唱《小心地滑》
跟Lyman一樣冇乜負評的Ash（盧信宥），指20強選唱《小心地滑》送給亡父被誤解，他稱歌曲有警戒含意似父親教導兒子。「中間有段詞係寫畀爸爸，佢哋話點解送呢首歌畀爸爸，我想帶出嘅message，呢首都係警戒世人如何去做人，其實好大部份都象徵住一個父親點樣去教導自己個仔，所以好想將呢個佢由細到大，車我去唱歌練習，教導我成個過程放喺呢個表演中間，佢對我講嘅說話，中間我都寫咗一段嘢，好似我對佢講嘅一個對話。」面試時已知爸爸不適的Ash，有掙扎過是否繼續來港比賽，「因為我都唔知自己可以行幾耐，就同屋企溝通，去到呢個年紀，冇幾多機會可以做到自己鍾意同堅持嘅事，所以趁住呢個咁兩難嘅時候，做返本份，兩邊都兼顧到，參賽時都安排好爸爸嘅醫療，完咗一輪比賽就飛返去。」