獨家丨「翻版林明禎」出寫真攻港搶食 32C Miko想搵港男拍拖:最好係叔叔
發佈時間：07:00 2023-07-22
「大馬女神」林明禎喺香港勁受歡迎，電影、廣告、Event勁多job，一早已老實自爆夠錢在香港買樓，不過女神話想買獨立屋，所以儲多少少錢先。同樣來自大馬，被封「翻版林明禎」的29歲索女Miko Wong（黃潔琪）亦步鄉里後塵來港搵食，就算執吓林明禎接唔晒嘅Job，應該都唔使捱窮。Miko趁書展攻港，第一炮就係推出第2本個人寫真集《Miko・琪幻日記》，有水著、有黑絲女教師等30款造型，仲因為喺台灣浸住溫泉影相搞到Nude Bra移位走晒光，因為單身冇有怕，仲想搵港男拍拖𠻹。採訪：方騫平
Miko表示出書係記錄自己由女孩成長為輕熟女生嘅過程，分別於港、台及大馬三地取景拍攝，當中以台灣浸溫泉最難忘：「因為浸得太耐搞到Nude Bra移位，單薄上衣透視到走晒光，搞到睇相時相當尷尬。」Miko的偶像唔係林明禎，係已上「神枱」的周秀娜，她大讚娜姐好有女人味。「其實唔一定着得少布就係性感，正如娜姐流露住一種氣質，早期狂野蛻變到𠵱家充滿女人味，一樣咁誘人。」
收包養DM得啖笑
Miko講到明想來港掘金，以林明楨為目標齊齊賺大錢，繼而在香港置業：「我喺大馬都見過明禎，佢好Cute呀，希望可以好好向佢偷吓師。」問到Miko點解咁有信心來港爭食？她稱因為經常做gym keep fit，對身材感到滿意：「最滿意42吋長腿，覺得比例上算係好睇。」另外，她又沾沾自喜透過社交網，收過唔少要求包養嘅DM，唔介意同大家分享：「如果我話冇(要求包養她)都冇人信啦，訊息中叫我唔好做，會畀錢我使，但證明自己唔太差，都有市場喎！」Miko大讚香港男fans好熱情，唔抗拒同港男拍拖：「我𠵱家單身，鍾意成熟穩重型，最好係叔叔(係咪首選要有物業?)唔介意一齊供樓。」不過目前以工作為重，她又順勢出口術搲撈：「由細睇港劇及電影大，好樂意拍戲向每位前輩學習，希望可以喺香港多啲發展機會啦。」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
