星8卦｜「闊太」望夫成龍急進輸身家靠做擦鞋仔博翻身

更新時間：11:30 2023-08-04
發佈時間：11:30 2023-08-04

近來無乜嘢都唔好去招惹「闊太」，因為「肥佬」真係周身唔掂。想當日為咗嫁，「闊太」放棄自己嘅大好事業，覺得女人未結過婚係失敗。佢一向做闊太大家姐，成日要充到好有面，「肥佬」係無乜本事，但勝在呃得下人，就話佢祖業在北方，潛力大家估唔到，仲要自己去買隻7位數鑽戒，話係「肥佬」嘅求婚戒指。

女人希望自己身邊嘅男人成材無可厚非，最慘「肥佬」真係爛泥無出息，「闊太」賣晒啲家當幫佢創業，初時都有啲起色，但遇着呢幾年，除非真係屋企大把至頂得住，已經唔係人材嘅「肥佬」更加輸到「闊太」全副身家都無埋。

而家兩公婆等緊一條大水喉幫手，但條件係要「闊太」幫佢做跟班，服侍一家人，隨傳隨到。「闊太」個心梗係好滾，但呢關過唔到兩公婆就好大鑊，隨時身敗名裂。「肥佬」一向唔理外面發生乜事，因為咁多年都係老婆話點就點，今次佢好醒叫「闊太」忍下，鬼叫自己無名氣幫唔到手。可以想像「闊太」心情有幾差，簡直係朋友勿近，唔係怕佢借錢，係受唔住佢嗰啲怪脾氣，個個都避開，祝福佢過到呢一關！