星8卦｜「純品」被「精叻」出賣好無面因禍得福「猛男」照顧衣食無憂

更新時間：11:30 2023-08-25
發佈時間：11:30 2023-08-25

「純品」一直當「精叻」係好姊妹，兩個人好似孖公仔咁去邊都一齊。因為兩個女人都靠樣貌同身材食飯，連搵老細都做伴。可能「純品」始終後生啲，比較受有錢叔叔歡迎，「精叻」始終生得惡死，桃花運梗係唔夠「純品」旺盛。自從有兩次大家一齊出擊，都係得「純品」有着落，「精叻」已經唔多想同「純品」玩，成日多多藉口要自己出馬，費事俾「純品」壞自己大事。

好死唔死，嗰日兩個人碰頭，「精叻」𥄫中一個有老婆嘅「猛男」，對方講明有幾多酬勞，條數唔錯㗎，但對方又係喜歡「純品」，激到「精叻」諗橋洩憤。佢用方法知道「猛男」帶「純品」出埠開心，竟然同記者報料，仲出埋錢請佢哋住酒店，因為間房好貴，「精叻」驚影唔到嘛，結果返嚟搞到好大鑊，「猛男」老婆搵人搞到「純品」家無寧日。

男人就係咁，最愛弱勢社群，諗住同「純品」合約完後各行各路，見佢俾人蝦得咁慘，決定將「純品」納為二奶，仲買咗層而家值過億嘅樓畀佢，個個月仲有家用，生活反而好安定，唔似「精叻」繼續奔波。