獨家丨余香凝曾擔心做阿媽冇得撈匿埋喊 姜大衛睇淡獎項激讚林保怡好演技
發佈時間：07:00 2023-11-04 HKT
姜大衛（John）和余香凝（Jennifer）第一次合作電影《白日之下》，後者更首度獲提名金馬獎最佳女主角，John哥大讚她演技有提升，而早已看淡獎項的他亦覺林保怡入圍最佳男配角好合理，更即場開設臨時演技講座分析角色，相當精彩。另外，Jennifer原來曾擔心生完女會冇得撈，被John哥取笑，「你思想咁舊嘅。」採訪：杜杜 攝影：Stanley髮型:Ken Hui@ArtifyLab(Jennifer) 化妝:Melody Chiu@melodychiumakeup(Jennifer) 服裝:Max Mara(Jennifer) 場地:1881 Heritage
John哥講到跟Jennifer的首合作即露甜笑：「佢似唔似我個孫？！」明顯對呢位「乖孫」相當滿意，不過他最初曾搞錯對方名字，「知道有呢個人，仲以為佘香凝，原來余香凝，拍嗰時已覺得幾夾，好似孫同阿爺感覺。」他更大讚Jennifer演技有提升，「睇戲先覺得佢同之前嘅表現唔同咗，成熟咗，表情上唔做戲，但係有戲㗎！呢個幾高境界，諗唔到咁快上到去。」Jennifer不信：「咁誇獎？！」John哥即說，「冇誇張，呢個角色同佢個做法，多少少就唔得，冇表情得嚟有戲，好高境界，我都未得，多多指教，哈哈！」
John哥讚保怡恰到好處
Jennifer開拍前擔心John哥會好cool，原來超親切，「會同周漢寧、梁雍婷、梁仲恆一齊食飯傾偈，我哋會問佢一啲好低能問題，例如『你哋係3兄弟，點解唔同姓嘅』哈哈！」啱玩之餘，John哥在演出上亦發揮好大助力，「成日有啲好得意嘅設計幫到角色，例如我每次想點煙，佢就搶咗去。」John哥解釋傾劇本時，已同導演度咗。Jennifer追問：「但都係你諗出嚟？」John哥謙稱：「大家傾，希望喺鏡頭前話畀人聽食煙唔好。」
電影獲金馬獎5項提名，除女主角外，還有林保怡和梁雍婷入圍最佳男、女配角，John哥讚3人實至名歸，特別是林保怡，「我好早同老婆講，保怡應該會入圍，佢角色難做過我角色，當然我都做得唔錯。」他再分析兩個角色的難度，「我個角色，只要有啲心機，有啲成熟及經歷都可以做到，而佢個角色難在，有啲做出嚟可能會over咗，有啲又唔到，但係佢啱啱好，𠵱家個個鬧院長，唔係鬧林保怡喎！呢個就係做戲做得好，將觀眾帶入角色，去鬧個角色佢就成功。」
Jennifer婚後仍多機會
已是兩子女之母的Jennifer坦言，做女時獲提名會沾沾自喜，做阿媽後反而變得踏實，更自爆生完第一胎後曾擔心前途，「直頭試過喺屋企喊，好記得嗰刻抱住囡囡食飯，佢扭計我就抱佢出去𠱁佢，望住條街有人拍緊戲，覺得好近我但又好遠咁。」John哥即刻出聲，「點解你啲思想咁舊呢！？哈哈！以前做演員拍拖唔敢話畀人聽，結婚生仔唔夠膽畀人知，食飯去街都要收收埋埋，我哋嗰代睬你都傻，又去玩，又去飲酒，𠵱家咁多大明星邊個未結婚，有仔女邊個唔知，觀眾𠵱家唔會care，係睇戲唔係睇偶像，唔同晒，呢套戲幫返你。」Jennifer感恩婚後仍有不少機會，「人哋有好多選擇，都願意相信我做媽咪之餘，都可以投入到演戲，我要攞個平衡繼續努力。」
76歲的John哥4歲已當童星，早在1970年已憑電影《報仇》，成為香港首位榮獲《亞洲影展》最佳男主角的演員，入行超過70年的他，對獎項早已看淡，「有獎又好，冇獎又好，你覺得幫到我咩！？可能係片酬，記得拍《十三太保》外景，記者衝晒嚟，『John，你攞咗最佳男主角』，我話『係咩唔該晒』，跟住拍完喺上面跳落嚟個鏡頭，就去瞓覺，有冇得獎冇關係，只要每部戲盡力去做，得到觀眾認同。」John哥又補充，稱拍過好多戲，只有兩部戲攞獎，但觀眾仍然記得其他電影，「有啲我都唔記得咗，OK㗎啦！」他又鼓勵Jennifer，「唔希望你今日攞咗獎，就畀自己壓力，下部戲因為係影后要做好啲，No！唔係影后都要做得好。」
《星島頭條》新網站有更多精彩內容：http://www.stheadline.com/
