獨家丨車婉婉自嘲樣衰講嘢直得罪向展鵬故母朋友可作證張英才非生父

更新時間：08:00 2024-01-09
發佈時間：08:00 2024-01-09

主持《中年好聲音》吸納唔少觀眾的車婉婉，於本周六(13日) 舉行《Next Step Stephanie 2024車婉婉音樂會》，亦是她入行31年的個人處女騷，屆時一班《中年》參加者會出任表演嘉賓。曾被向展鵬於社交網鬧爆的車婉婉歡迎對方參與，坦言可能唔夠「愛」他，有機會的話會當面追問他：「做乜唔開心？」採訪：方騫平攝影：鄧國良

跟車婉婉同期的歌手陳奕迅、鄭秀文、許志安及黎瑞恩等個個都開過個唱，婉婉表示從不羨慕，因為知道自己乜料，之前未去到開騷地步，加上曾經失聲。婉婉指自己的人生好奇妙，就算失去最有信心嘅聲線，卻拍到電影、電視劇，甚至爛聲做電台節目。

入行31年冇敵人
提到向展鵬曾在社交平台鬧爆「某女歌手」九唔搭八，相識30年不值一提，更斥：「個人好扮嘢仲寸我！」婉婉被對方衝著而來摸不著頭腦，勁無奈：「我個人好直，而且唔笑睇落好寸，可能我講嘢太大聲，又生得樣衰，對唔住，佢覺得唔夠愛及關注所以產生咗誤會，而且我點會去寸人？《中年》係我嘅家庭，唔會對佢唔好。」車婉婉坦言歡迎向展鵬到場：「成班《中年》同學嚟支持，我唔會叫佢唔嚟，將來碰頭會直接問清楚佢『咩事唔開心？有冇啲嘢我會做好啲？』人生匆匆幾十年，為乜要唔開心呢？」婉婉強調自己冇死敵，包括傳不和的黎瑞恩。

另外，50歲的她又揭身世之謎，重申才叔叔(張英才)絕對不是生父：「傳咗幾十年，講極啲人都唔信，老竇就係老竇；叔叔就係叔叔，使唔使驗DNA？其實媽咪朋友係知情嘅，但連長輩都唔出聲講，邊輪到我發聲呀？而且我尊重兩位先人。」

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ