冼靖峰珍惜鄭則仕教導憶離世祖父感激前輩公開讚有天份又勤力丨獨家

更新時間：07:00 2024-05-28
發佈時間：07:00 2024-05-28

冼靖峰（Archie）在《神耆小子》首次孭重飛演出，遇着影帝級前輩鄭則仕（Kent哥）令他壓力倍增。Kent哥在本報訪問時公開大讚他有天份又勤力，他感激之餘，亦慶幸 Kent哥親切又肯幫後輩，令他想起已過世爺爺的教導。採訪：杜杜攝影：朱偉彥髮型:Hugo Poon 化妝:King Yip 服裝:FACETASM、MM6 Maison Margiela、Harvey Nichols HK

Archie繼《青春本我》和內地劇《戀戀紅塵》後，《神耆》是第3次拍劇已戲份極重，與Kent哥有大量對手戲，雖然壓力超大，但亦知機會難得，「未拍前台前幕後同我講好幸運，可能拍20年戲都未必拍到咁好嘅前輩，遇到會成長得好快，要好好把握機會，得到嘅嘢係無價，仲有阿蕭（蕭正楠）、阿廉（曹永廉）同Amy姐（樊亦敏）都教咗我好多嘢，真係好感恩。」

Archie在《神耆》跟一班前輩合作，獲益良多。

首次拍咀戲的Archie，幸好有羅毓儀帶住入戲。

成功演出失控爆喊

對於Kent哥在本報訪問公開大讚有天份又勤力，還給75分以上，Archie感激前輩讚賞。Kent哥力讚他能在半小時內，調整重頭戲演出，他坦認當時比考公開試或《亞洲超星團》學跳舞更難，「我唔知呢場戲咁重要，有機會拖垮其他人，知道後壓力頂點係點可以喺放飯半個鐘，消化到Kent哥調整咗嘅嘢，係咁催眠自己『頂到就會進步，唔可以衰』。」最終他在Kent哥引導下1 take過完成，但拍完即情緒失控，「睇返playback，聽到Kent哥話『幾好』，我踎咗喺地下喊咗20、30分鐘，第1次好似畀人挖空咗個心，好有成功感，多謝Kent哥扶持同個天，畀我順利完成。」

Archie話Kent哥私底下雖然氣場勁，但好玩得。

Archie聽到Kent哥讚賞，開心到拍晒手。

Archie獲Kent哥讚賞，令他相當感動。

談到跟Kent哥私底下相處，Archie形容跟劇中關係差不多，還多份親切感，「佢講嘢語氣甚至樣貌神情，有少少似我過身嘅爺爺，好似爺爺同我一齊做嘢咁，爺爺教我好多大智慧說話，仲未明但會記住，Kent哥一樣，第1日開工同我講每句說話，唔係全部都明，會放喺心慢慢領悟。」他跟Kent哥相處點滴也有跟爸爸分享，「爹哋聽見都眼濕濕，要搵次帶爹哋見吓Kent哥。」