車婉婉死過翻生自揭瘡疤3度啜泣 含淚感謝大恩人曾志偉從谷底拯救丨獨家
發佈時間:07:00 2024-06-11
50歲車婉婉出身自92年第11屆《新秀》,近年憑主持兩輯《中年好聲音》鹹魚大翻生。入行32年,婉婉自稱一直好霉,講到辛酸史更悲從中來,3度落淚。向來強勢的她自爆2007年母親車綺芬離世後,因為爛聲唱唔到歌,亡母的心血酒樓又管理不善,欠落大堆街數,自己積蓄亦見底,人生跌落谷低!幸得大恩人曾志偉出手營救,畀機會她做《中音》主持,展開奇妙的人生下半場。採訪:方騫平 攝影:羅安強 髮型:YoYo Hui 化妝:Meegan Seak 服裝:PortsPURE
車婉婉主持《中音》後知名度大增,去年仲客串TVB台慶劇《新聞女王》,演霸氣前台柱主播「華姐」,贏盡好評,今年又首度開個人音樂會及跟「中一生」有登台機會。她坦言𠵱家搵錢升幅係百份百,是入行以來最順境的時間。
車婉婉能夠「鹹魚翻生」,全靠曾志偉欽點她做《中年好聲音》主持:「我17歲出道就跟住佢去做扶貧及幫明星足球隊籌款,記得有日志偉打嚟問『鯇魚(花名),你好多嘢拍咩?』我答麻麻啦,佢就秒回『咁得喇,有個綜藝節目搵你做,聽日返去同你度期。』完成兩季節目後傳短訊多謝佢,做人要飲水思源。」婉婉講到眼有淚光:「處女主持綜藝節目,有包袱及壓力,第一日錄影志偉都有嚟監場,我都驚做得唔好下季冇份嘛。」
![曾志偉係婉婉大恩人。 曾志偉係婉婉大恩人。](https://image.hkhl.hk/f/1024p0/0x0/lr/sthl/9619bff6b3cfb69d8ea8333b814a2ff6/2024-06/Screenshot_20240531_025002_com_instagram_android_-__0.jpg)
![曾跟曾志偉一齊錄影謝霆鋒的《12道鋒味》。 曾跟曾志偉一齊錄影謝霆鋒的《12道鋒味》。](https://image.hkhl.hk/f/1024p0/0x0/lr/sthl/0e744897f480ffcf7f53ad780cac7f27/2024-06/171801367659934.jpg)
Sammi介紹醫生救聲帶
1992年入行的車婉婉坦言一直好霉:「你估拍劇好多錢咩?電影幾年先拍得一部,每次得嗰3、5組戲,條數根本計唔到,係呢?連自己都唔知呢32年係點過?阿媽在生咪用阿媽啲錢;阿媽唔喺度唯有搵少少錢,見一日行一日囉。』」婉婉自細由阿媽帶大,媽媽離世後冇晒方向,甚至迷失到陷入抑鬱狀態,終日掛住食煙飲酒,聲都爛埋唱唔到歌,不幸中大幸獲另一位恩人俞琤收留,安排她拍住林曉峰主持商台節目,一做7年,總算有穩定收入:「但唱歌係我最愛,用嚟抒發情感,當時真係覺得唱歌放棄咗我,上天叫我要收檔喇,就算gathering時,朋友拎枝咪埋嚟我都好抗拒咁推開,真係好唔開心,打後10幾年再冇人搵我做唱歌show,開演唱會更加係發夢!鄭秀文知我好唔開心,介紹一位喺美國中部嘅專科名醫畀我,因為醫藥費太貴,加上冇人冇物,最後睇港大一位教授,中西合璧治療,近年又唱得返歌。」
做藝人真係咪做生意
講到人生中最難受的事,婉婉坦言是守唔住亡母生前經營的酒樓,於2019年的母親節倒閉,她哭著說:「呢間嘢係媽媽留畀我,佢走咗我要勉強接手,但飲食生意真係好難做,唔係一個普通人識得做,真係冇晒辦法,嗰幾年嘅利潤點都追唔到要交幾百萬租金,我喺疫情前忍痛結業算係執身彩(蝕咗幾多?)唔好講!唔識計!唔想計…仲因為太單純信錯人搞到一身蟻,所有錢冇晒,從呢件事體會到,藝人係唔應該做生意。」當時婉婉一無所有,兒子BBQ又出世,只能開源節流養家及主動搲撈:「我覺得自己講嘢OK,好想畀人睇到我做綜藝主持係得嘅,試過『打大佬』敲綜藝組高層嘅門話好想做,但都無功而回。」自己冇嘢做,老公於疫情期間又教唔到游水。「我好抑鬱,要打多份工做理財顧問增加收入,做人真係好困難,所以見到參賽者喺舞台上分享人生經歷,我會用心去聽及用感性角度去了解,特別係屋企人離世。感恩喺變態路程有經理人陪伴,喺佢身上學到好多嘢。」語畢,婉婉又再落淚。另外,對於向展鵬跟她道歉,婉婉笑說:「又唔使道歉,自己真係寸過佢會心虛,我點會窒我啲『屋企人』啫?唔緊要,下次一齊飲過。」
《星島申訴王》推出全新項目「我要讚佢」欄目,現誠邀市民投稿讚揚身邊好人好事,共建更有愛社區。立即「我要讚佢」︰https://bit.ly/3uJ3yyF
想睇更多精彩內容,請立即瀏覽「區區有申訴」活動專頁,https://bit.ly/41hgS9E
緊貼最新最快新聞資訊,請立即下載星島頭條App:https://bit.ly/3Q29Vow