裕美不滿被責性冷感爆林作床事：佢話嚟就嚟好冇Mood 出歌俾黑粉抨擊冇身材丨獨家
發佈時間：07:00 2024-06-28
最近裕美自資6位數字推出新歌《最佳女友的自我修養》，唱出「最佳女朋友」嘅心路歷程。和全城鬧爆嘅「抽水王」林作拍拖6年，裕美不時為男友拆彈，被封為「最佳女朋友」，唯獨裕美常投訴林作冇性慾，兩人性生活唔多。34歲林作則揭床事為自己「唔得」大平反：「佢唔肯同我玩角色扮演，最嘔心着我啲底衫褲瞓覺，甚至換上核突長袖阿婆睡衣。」採訪：方騫平 攝影：羅安強
裕美係2007年樂壇新人，唱過《雪映移城》、《搭錯車(Yamete!)》等歌，最後一首作品係2011年嘅《怎麼還愛我》。時隔13年，她以原名和田裕美重新出發，回歸樂壇，獲唔少網民留言支持，大讚當年回憶都返晒嚟；但有啲無聊負評，踩裕美冇波、個樣又膠！搞到裕美要親回「招呼」佢哋：「我直接留言話『關你乜事？』、『你唔會係我杯茶。』以前見到呢啲會唔開心一日，但𠵱家真係唔會在意，反正我又唔識得佢。」
由迷失變成功女性
林作展示裕美留齊陰肥嘟嘟舊照，大讚女友各方面都越來越有進步：「人要有歷練，佢明白到齊音及肥胖唔係方法，所以要搵返自己…識佢6年睇住佢昇華變咗另一個人，由最初處於抑鬱、迷失狀態，要食藥治療；𠵱家佢好強好獨立。」林作更自爆有戀母癖，他眼中嘅裕美已有媽媽年輕時強人模樣，搵錢目標清晰。裕美解釋：「係因為佢常出事，要變得心臟強大去支持佢，加上佢咁度縮，明白男人唔可靠，要發奮搵錢。」拍拖6年，兩人已捱過磨合期，甚少爭吵，林作搞鬼形容跟裕美關係似屋企4隻狗：「佢哋雖然同一屋簷下，但唔係friend，會各自各瞓開。」
冇配套協調性生活
談及性生活，35歲裕美直認跟林作性生活唔協調：「我自己冇問題，只係唔得佢『話嚟就嚟』，咁樣好難有mood。」林作強調係大家情趣品味唔同：「我鍾意玩角色扮演，要求佢扮老師等角色，甚至曾經準備晒皮鞭、手銬等情趣用品，點知佢離開TVB太耐冇晒啲表演慾，𠵱家冇任何配套提供到畀我…」林作越講越激動叫大家評理：「初期佢都有着性感內衣嘅，打後唔係着住我啲低衫褲嚟瞓，再過份啲會換上極度嘔心，令人冇晒性慾嘅阿婆針織衫，我曾經多次要求佢換衫，佢只會變本加厲買多幾件唔同色系，然後嘲笑我對件衫有恐懼，因為佢一件衫，摧毀咗我哋一段感情呀！但我仲可以克服陰影，鼓起勇氣『話嚟就嚟』仲想點呀？佢偏偏只係講個果，忽略講解因。」裕美則答辯：「因為怕凍嘛，佢對我冇乜性趣仲好，慳返啲時間嚟瞓覺，反正大家都咁忙，而且對住佢冇乜幻想空間，通常佢會自己『解決』。」林作認為自己係個正常男人，只要解決到睡衣問題，就唔會一年『行埋』得1/2次咁少。」
已成功收拾新何太
另外，林作曾以100萬邀約金搵新何太開班教「煲湯」，最後新何太不滿分紅問題反口唔撈，還寸林作冇「腎容」(信用)，「被釘」律師牌證明人品差！林作對此火速反駁，怒插新何太嘅片令網民大快人心，旋即翻盤獲力撐。終被讚係「靚抽」，林作分析說：「要搵個畀我更乞人憎嘅對家唔容易，對手唔係時時有，上次嗰個係鍾培生。不過，係有唔少網民有DM我，話我幫到大家發聲及出啖氣。」面對何太出口狂言，林作唔打算入稟控告：「冇錢及太有實力嘅人係唔會搞，佢有錢就唔係叫新何太啦，費事嘥時間兼蝕埋律師費，𠵱家我經已成功收拾佢啦。」
