教主誕丨Anson Lo睇家書感動落淚 神徒「My Life」三層蛋糕祝賀 邁向3字頭期待更成熟的自己
發佈時間：18:28 2024-07-07
MIRROR成員盧瀚霆（Anson Lo）今日（7日）29歲生日，一眾神徒（粉絲暱稱）為他海陸空的生日應援，包括《Anson Lo & Sontos - SoaR Pop UpStore》、尖沙咀碼頭的巨型LED大電視、連續第三年的免費渡輪服務外，今晚八時半，在尖沙咀西九文化區上空上演壓軸慶祝活動一《Anson Lo &Sontos - SoaR 無人機匯演》。一向愛錫神徒的Anson Lo亦特別抽時間出席「LET’S SOAR LET’S PARTY」生日會，與2000神徒一起過生日。眾神徒身穿粉紅色會服到場，現場也佈置了很多粉色系心心氣球，而神徒帶來的生日禮物也放滿長枱，未入場前，一眾神徒也在印有Anson Lo樣貌的巨型佈景板前打卡。
Anson Lo身穿粉紅色衫襯白褲現身生日會，活動上播出來自世界各地包括加拿大、澳洲、台灣、馬來西亞、新加坡、英國等神徒的應援短片，也播出Anson Lo的家姐、爸爸及媽媽寫給他的家書，當中家姐分享她與Anson Lo小時候在家中著內衣跳唱Twins的歌及兩人一起玩角色扮演等事情，她亦叮囑教主起身要飲水，食多點菜，爸爸也表示以他為榮，媽媽則叮囑他「出於污泥而不染，濯清漣而不妖」，Anson Lo在第一次睇家書的時候也感動到又喊又笑，而第二次睇時表示比第一次睇更震撼，因為可以思考信中內容，之後他又透露自己為何如此感動：「因為成件事好有愛，因為家姐係一個內斂嘅人，佢好少咁講呢啲事，我睇完諗翻起以前細個嘅時候，同佢打打鬧鬧嘅回憶，我記得家姐細個好怕鬼，要捉埋我去壯膽。早排同家人食飯都交代健康，家姐佢喊咗成晚但又唔知可以做咩，真係好錫我。」他亦向神徒表達心底話，多謝大家嘅支持：「因為我全靠你地嘅支持，先捱到今日！即使出面好多人誤解我，你地嘅留言成為我嘅鼓勵。」Anson Lo又即場與神徒全場大合唱《不可愛教主》，而見到生日蛋糕有「My Life」造型翅膀，三層生日蛋糕，一眾神徒也大唱生日歌，Anson Lo看到蛋糕也大感好奇，未切蛋糕已表示希望將翅膀帶返屋企，非常搞笑。
生日願望：神徒同家人都身體健康
生日會尾聲，Anson Lo逐一向神徒派「手幅」，歌迷近距離向偶像送上生日祝福。活動完結後Anson Lo接受訪問，他表示見到家人真情流露好感動，覺得佢地好大勇氣寫呢封家書：「知道佢地每日都好擔心我、Care我，所以好感動。今年生日願望係想神徒同家人都身體健康，因為大個咗知道健康嘅重要。今晚會同家人過一齊砌蛋糕。即將由2字轉3字，覺得唔會太大分別，隨時間過去會成熟啲，神徒都話冇咗以前嘅嘻嘻哈哈，可能係人大咗會沉穩咗、成熟咗。」
